ન્યૂ યોર્કમાં ચાલી રહેલા વર્ષના છેલ્લા ગ્રાન્ડ સ્લેમ, યુએસ ઓપન દરમિયાન એક વિચિત્ર ઘટના સામે આવી છે. રોમાનિયન ટેનિસ ખેલાડી સોરાના ક્રિસ્ટીએ તેના હોટલના રૂમમાંથી તેની ક્લેવલેન્ડ ટ્રોફી ચોરાઈ હોવાની માહિતી આપી છે. તેણે સોશિયલ મીડિયા પર આ વિશે પોસ્ટ કરીને ચોરી કરનાર વ્યક્તિને ટ્રોફી પરત આપવાની વિનંતી કરી છે.
 
ઘટનાની વિગતો
૩૫ વર્ષીય સોરાના ક્રિસ્ટીએ શનિવારે રાત્રે તેના ઇન્સ્ટાગ્રામ પર એક સ્ટોરી પોસ્ટ કરી. જેમાં તેણે લખ્યું કે, "જે કોઈએ ધ ફિફ્ટી સોનેસ્ટા હોટેલના રૂમ નંબર ૩૧૪ માંથી મારી ક્લેવલેન્ડ ટ્રોફી ચોરી છે. કૃપા કરીને તેને પરત કરો. તેનું કોઈ આર્થિક મૂલ્ય નથી, પરંતુ તેનું ભાવનાત્મક મૂલ્ય ઘણું છે."

તાજેતરમાં જીતી હતી ટ્રોફી
ક્રિસ્ટીએ આ જ મહિને ક્લેવલેન્ડમાં તેની કારકિર્દીનું ત્રીજું સિંગલ્સ ટાઇટલ જીત્યું હતું. તેણે ફાઇનલમાં અમેરિકાની અન્ના લીને સીધા સેટમાં ૬-૨, ૬-૪ થી હરાવી હતી. ફાઇનલ જીત્યા બાદ તેણે ટ્રોફી સાથેનો ફોટો પણ ઇન્સ્ટાગ્રામ પર પોસ્ટ કર્યો હતો અને તેને 'શાનદાર અઠવાડિયું' ગણાવ્યું હતું.

જોકે, યુએસ ઓપનમાં ક્રિસ્ટીને સફળતા ન મળી. તે બીજા રાઉન્ડમાં જ ચેક રિપબ્લિકની કેરોલિના મુચોવા સામે ૭-૬, ૬-૭, ૬-૪ થી હારી ગઈ હતી અને ટૂર્નામેન્ટમાંથી બહાર થઈ ગઈ હતી.