નવી દિલ્હી ૨ સપ્ટેમ્બર, ૨૦૨૫: બેડમિન્ટનના ચાહકો માટે એક મોટા અને ખુશખબર સામે આવ્યા છે! ૨૦૨૬ની BWF વર્લ્ડ બેડમિન્ટન ચેમ્પિયનશિપ ભારતમાં, ખાસ કરીને નવી દિલ્હીમાં યોજાવાની છે. પેરિસમાં ચાલી રહેલી વર્લ્ડ ચેમ્પિયનશિપના સમાપન સમારોહમાં આ જાહેરાત કરવામાં આવી, જેનાથી ભારતીય રમતગમત જગતમાં ખુશીની લહેર દોડી ગઈ છે.

આ જાહેરાત એવા સમયે થઈ છે જ્યારે ભારતની સ્ટાર ડબલ્સ જોડી સાત્વિકસાઈરાજ રંકીરેડ્ડી અને ચિરાગ શેટ્ટીએ પેરિસમાં બ્રોન્ઝ મેડલ જીતીને દેશનું નામ રોશન કર્યું છે. આ વર્લ્ડ ચેમ્પિયનશિપમાં તેમનો આ બીજો મેડલ છે, જે ભારતીય બેડમિન્ટન માટે એક મોટી ઉપલબ્ધિ છે.
 
ભારતનું વાયદો: "શ્રેષ્ઠતા અને ભવ્યતા"

*બેડમિન્ટન એસોસિએશન ઓફ ઇન્ડિયા (BAI)*ના જનરલ સેક્રેટરી સંજય મિશ્રાએ BWFનો આભાર માનતા કહ્યું, "ભારતને આ યજમાનપદ સોંપવા બદલ અમે BWFના આભારી છીએ. અમે ખાતરી આપીએ છીએ કે ભારત પણ પેરિસની જેમ જ શ્રેષ્ઠતા અને ભવ્યતાને આગળ ધપાવશે. અમે સમગ્ર બેડમિન્ટન પરિવારનું દિલ્હીમાં સ્વાગત કરવા આતુર છીએ."
 
વર્લ્ડ ચેમ્પિયનશિપમાં ભારતનો ઇતિહાસ
ભારત અત્યાર સુધીમાં વર્લ્ડ બેડમિન્ટન ચેમ્પિયનશિપમાં કુલ ૧૫ મેડલ જીતી ચૂક્યું છે. આ મેડલનો ઇતિહાસ ખૂબ જ ગૌરવપૂર્ણ છે:

• પીવી સિંધુ: ભારતના સૌથી સફળ ખેલાડીઓમાંના એક, સિંધુએ એકલા હાથે ૫ મેડલ જીત્યા છે, જેમાં ૧ ગોલ્ડ, ૨ સિલ્વર અને ૨ બ્રોન્ઝનો સમાવેશ થાય છે.

• સાઈના નેહવાલ: ઓલિમ્પિક મેડલ વિજેતા સાઈનાએ પણ ૨ બ્રોન્ઝ મેડલ જીતીને ભારતનું નામ રોશન કર્યું છે.

• અન્ય મહાન ખેલાડીઓ: કિદામ્બી શ્રીકાંતે ૨૦૨૧માં સિલ્વર મેડલ જીત્યો હતો, જ્યારે સાઈ પ્રણીત, લક્ષ્ય સેન અને એચએસ પ્રણોયે તાજેતરના વર્ષોમાં બ્રોન્ઝ મેડલ જીત્યા છે.

• પ્રકાશ પાદુકોણ: ભારત માટે આ સ્પર્ધાનો પહેલો મેડલ ૧૯૮૩માં પ્રકાશ પાદુકોણે કોપનહેગનમાં બ્રોન્ઝ મેડલ જીતીને અપાવ્યો હતો.

• જ્વાલા ગુટ્ટા અને અશ્વિની પોનપ્પા: મહિલા ડબલ્સમાં આ જોડીએ ૨૦૧૧માં બ્રોન્ઝ મેડલ જીત્યો હતો.

૨૦૨૬ની ચેમ્પિયનશિપ ભારતીય ખેલાડીઓ માટે ઘરેલુ મેદાન પર જીતવાની વધુ એક મોટી તક લઈને આવશે. ચાહકો પણ આ મોટી ઇવેન્ટની આતુરતાથી રાહ જોઈ રહ્યા છે.