નવી દિલ્‍હીઃ એશિયા કપ 2025માં આજે રવિવારે 14 સપ્ટેમ્બરના રોજ રાતે 8 વાગે ભારત અને પાકિસ્તાન આમને સામને આવશે. સૂર્યકુમાર યાદવની કેપ્ટનશીપ હેઠળની ભારતીય ટીમે પોતાની પહેલી મેચમાં સંયુક્ત આરબ અમીરાત (UAE)ને 9 વિકેટથી હરાવી દીધું હતું. તો પાકિસ્તાની ટીમે પણ ઓમાનને 93 રનથી હરાવીને આ ટુર્નામેન્ટમાં શાનદાર શરૂઆત કરી હતી.

ભારત અને પાકિસ્તાન વચ્ચેની મેચ દુબઈ ઇન્ટરનેશનલ ક્રિકેટ સ્ટેડિયમમાં રમાશે. આ મેદાન પર ભારતીય ટીમનો રેકોર્ડ સારો રહ્યો છે. ભારતીય ટીમે અહીં 10 T20 આંતરરાષ્ટ્રીય મેચ રમી છે, જેમાંથી 6માં જીત મેળવી છે, જયારે 4 મેચમાં હારનો સામનો કરવો પડ્યો છે. ભારતીય ટીમે આ મેદાન પર પાકિસ્તાન સામે ત્રણ T20 આંતરરાષ્ટ્રીય મેચ રમી છે, જેમાં ફક્ત એકમાં જ જીત મળી હતી. બાકીની બે મેચ પાકિસ્તાની ટીમે જીતી હતી. T20 વર્લ્ડ કપ 2021માં બંને ટીમોએ અહીં એક મેચ રમી હતી. એ વખતે પાકિસ્તાને ભારતને 10 વિકેટથી હરાવ્યું હતું.

પછી એશિયા કપ 2022માં, બંને ટીમો આ મેદાન પર બે વાર ટકરાઈ, જેમાં પહેલી મેચમાં ભારતીય ટીમ 5 વિકેટથી જીતી ગઈ હતી, જયારે બીજી મેચમાં પાકિસ્તાની ટીમ 5 વિકેટથી જીતી હતી. હવે ભારતીય ટીમ આ મેચ જીતીને બરાબરીનો એટલે કે 2-2 સ્કોર કરવા માંગશે.

દુબઈ ઇન્ટરનેશનલ ક્રિકેટ સ્ટેડિયમમાં ટોસની ભૂમિકા પણ મહત્ત્વપૂર્ણ રહે છે. ભારતીય ટીમે આ મેદાન પર રમાયેલી 10 ટી20 આંતરરાષ્ટ્રીય મેચમાંથી, 4માં ટોસ જીત્યો અને મેચ પણ જીતી. આનો અર્થ એ થયો કે જ્યારે પણ ભારતીય ટીમે આ મેદાન પર ટી20 આંતરરાષ્ટ્રીય મેચમાં ટોસ જીત્યો, ત્યારે તેણે મેચ પણ જીતી છે.

આ મેદાન પર ભારતીય ટીમ બાકીની 6 ટી20 આંતરરાષ્ટ્રીય મેચમાં ટોસ જીતી શકી નથી. જેમાં ટોસ હારવા છતાં 2 મેચ જીતી હતી, જ્યારે ચારમાં તેને હારનો સામનો કરવો પડ્યો. આ મેદાન પર રમાયેલી 95 T20 આંતરરાષ્ટ્રીય મેચોમાં, ટોસ જીતનાર ટીમ 55 વખત વિજેતા રહી છે. જ્યારે 40 મેચોમાં, ટોસ હારનાર ટીમ મેચ જીતી ગઈ.

સૂર્યકુમાર યાદવ (કેપ્ટન), શુભમન ગિલ (ઉપ-કેપ્ટન), અભિષેક શર્મા, તિલક વર્મા, હાર્દિક પંડ્યા, શિવમ દુબે, જીતેશ શર્મા (વિકેટકીપર), અક્ષર પટેલ, અર્શદીપ સિંહ, રિંકુ સિંહ, સંજુ સેમસન (વિકેટકીપર), હર્ષિત રાણા, જસપ્રીત બુમરાહ, કુલદીપ યાદવ, વરુણ ચક્રવર્તી.

સલમાન અલી આગા (કેપ્ટન), અબરાર અહેમદ, ફખર જમાં, હારિસ રાઉફ, હસન અલી, હુસૈન તલત, હસન નવાઝ, ખુશદિલ શાહ, મોહમ્મદ હારિસ, મોહમ્મદ નવાઝ, મોહમ્મદ વસીમ જુનિયર, સલમાન મિર્ઝા, શાહીન આફ્રિદી, સુફિયાન મુકીમ, સઇમ અયુબ, સાહિબઝાદા ફરહાન, ફહીમ અશરફ.