ગુવાહાટી:  મહિલા વર્લ્ડ કપ 2025ની પહેલી મેચ ગુવાહાટીના બારસાપારા ક્રિકેટ સ્ટેડિયમમાં વરસાદને કારણે રોમાંચક વળાંક પર પહોંચી ગઈ છે. શ્રીલંકાએ ટોસ જીતીને ભારતને પ્રથમ બેટિંગ માટે આમંત્રણ આપ્યું હતું, પરંતુ વરસાદે બે વખત વિક્ષેપ પાડ્યો, જેના કારણે મેચ મૂળ 50 ઓવરથી ઘટાડીને 47 ઓવરની કરવામાં આવી છે.

વરસાદ અને કપરા પડકારો વચ્ચે પણ ભારતીય ટીમે મજબૂત બેટિંગ કરીને 47 ઓવરમાં 8 વિકેટે 269 રન બનાવ્યા છે. ઓવર ઘટાડાને કારણે શ્રીલંકાને જીતવા માટે 271 રનનો સુધારેલો લક્ષ્યાંક આપવામાં આવ્યો છે.

અમનજોત-દીપ્તિ બન્યા સંકટમોચક!
ભારતની શરૂઆત ખરાબ રહી હતી, જ્યારે ઉપ-કેપ્ટન સ્મૃતિ મંધાના આ વર્ષે પહેલીવાર બે આંકડા સુધી પહોંચવામાં નિષ્ફળ રહી અને માત્ર 8 રન બનાવીને આઉટ થઈ. કેપ્ટન હરમનપ્રીત કૌર પણ (21 રન) લાંબી ઇનિંગ રમી શકી ન હતી.

આ મુશ્કેલ સમયમાં મધ્યક્રમની બે બેટર દીપ્તિ શર્મા અને અમનજોત કૌરે ટીમને સંભાળી:
•    અમનજોત કૌર (57 રન): 56 બોલમાં 5 ચોગ્ગા અને 1 છગ્ગાની મદદથી અમનજોતે પોતાની પહેલી વનડે અડધી સદી ફટકારી. આ ઇનિંગમાં તેના બે કેચ પણ છૂટી ગયા હતા.
•    દીપ્તિ શર્મા (53 રન): દીપ્તિ શર્માએ 50 બોલમાં પોતાની 16મી વનડે અડધી સદી પૂરી કરી.
•    સહાયક ઇનિંગ્સ: હરલીન દેઓલે 48 રનનું મહત્ત્વપૂર્ણ યોગદાન આપ્યું, જ્યારે અંતમાં સ્નેહ રાણાએ 15 બોલમાં અણનમ 28 રન બનાવીને સ્કોરને મજબૂત સ્થિતિમાં પહોંચાડ્યો.

શ્રીલંકાએ હવે 47 ઓવરમાં 271 રનનો લક્ષ્યાંક હાંસલ કરવાનો રહેશે. ક્રિકેટ ચાહકો માટે આ મેચ રોમાંચક બની રહેવાની પૂરી સંભાવના છે!