અમદાવાદ, તા.૨

ભારત અને વેસ્ટ ઈન્ડિઝ વચ્ચે પહેલી ટેસ્ટ મેચ રમાઈ રહી છે. આ મેચમાં વેસ્ટ ઈન્ડિઝના બેટ્સમેન ખરાબ રીતે નિષ્ફળ રહ્યા. આખી વેસ્ટ ઈન્ડિઝ ટીમ ફક્ત ૧૬૨ રન જ બનાવી શકી. ભારત માટે મોહમ્મદ સિરાજ, જસપ્રીત બુમરાહ અને કુલદીપ યાદવે સારી બોલિંગ કરી અને વિરોધી ટીમને ઓછા સ્કોર સુધી રોકવામાં મુખ્ય ભૂમિકા ભજવી.

જસપ્રીત બુમરાહએ વેસ્ટ ઈન્ડિઝ સામેની પહેલી ઇનિંગમાં ત્રણ વિકેટ લીધી હતી. તેણે ઓપનર જોન કેમ્પબેલ, જસ્ટિન ગ્રીવ્સ અને જોહાન લેનને આઉટ કર્યા. આ સાથે ભારતીય ફાસ્ટ બોલર જસપ્રીત બુમરાહએ વર્લ્ડ ટેસ્ટ ચેમ્પિયનશિપમાં ભારતીય ધરતી પર ૫૦ વિકેટ પૂર્ણ કરી હતી. તે WTCમાં ઘરેલુ મેદાન પર ૫૦ વિકેટ લેનાર પ્રથમ ભારતીય ફાસ્ટ બોલર બન્યો છે.  તેમના પહેલા રવિચંદ્રન અશ્વિન (૧૪૯ વિકેટ) અને રવિન્દ્ર જાડેજા (૯૪ વિકેટ) વર્લ્ડ ટેસ્ટ ચેમ્પિયનશિપમાં ઘરેલુ મેદાન પર ૫૦ થી વધુ વિકેટ લઈ ચૂક્યા છે, પરંતુ બંને સ્પિનર છે.

જસપ્રીત બુમરાહએ વર્લ્ડ ટેસ્ટ ચેમ્પિયનશિપમાં ઘરઆંગણે કુલ ૧૩  મેચ રમી છે, જેમાં ૫૦  વિકેટ લીધી છે. આ સમયગાળા દરમિયાન તેનું શ્રેષ્ઠ પ્રદર્શન એક ઇનિંગમાં ૪૫  રન આપીને ૬ વિકેટ હતી. બુમરાહનો યોર્કર અજોડ છે, અને જ્યારે તે તેની લયમાં હોય છે, ત્યારે તે કોઈપણ બેટિંગ આક્રમણને તોડી શકે છે.

જસપ્રીત બુમરાહને ભારતના શ્રેષ્ઠ ખેલાડીઓમાંના એક માનવામાં આવે છે અને તેણે એકલા હાથે ઘણી મેચોમાં ટીમ ઈન્ડિયાને જીત અપાવી છે. તેણે ૨૦૧૮ માં ભારત માટે ટેસ્ટ ડેબ્યૂ કર્યું હતું. ત્યારથી, તેણે ૪૯  ટેસ્ટમાં કુલ ૨૨૨  વિકેટ લીધી છે, જેમાં ૧૫ પાંચ વિકેટનો સમાવેશ થાય છે.

અમદાવાદમાં વેસ્ટ ઈન્ડિઝ સામેની પ્રથમ ટેસ્ટના પહેલા દિવસે મોહમ્મદ સિરાજે એક મોટો રેકોર્ડ બનાવ્યો. તેણે પહેલા સત્રમાં કુલ ત્રણ વિકેટ લીધી, જેમાં ચોથા સત્રમાં તેની પહેલી વિકેટનો પણ સમાવેશ થાય છે. આ સાથે  તે આ વર્ષની વર્લ્ડ ટેસ્ટ ચેમ્પિયનશિપમાં રમી રહેલી ટીમોમાં સૌથી વધુ વિકેટ લેનાર બોલર બન્યો. તેણે મિશેલ સ્ટાર્કને પાછળ છોડી દીધો, જે હવે બીજા સ્થાને પહોંચી ગયો છે.