નવી દિલ્હી: ભારત અને વેસ્ટ ઇન્ડીઝ વચ્ચે દિલ્હીમાં રમાઈ રહેલી બીજી ટેસ્ટ મેચના ત્રીજા દિવસે ભારતીય સ્પિનર કુલદીપ યાદવે શાનદાર પ્રદર્શન કરીને પોતાના નામે એક મોટો રેકોર્ડ નોંધાવ્યો છે. તેણે ૨૬ ઓવર બોલિંગ કરીને ૮૨ રન આપીને ૫ વિકેટ ઝડપી હતી અને ઇતિહાસના પાનામાં પોતાનું નામ અંકિત કરી લીધું છે.
કુલદીપ યાદવે પોતાની કારકિર્દીની માત્ર ૧૫મી ટેસ્ટ મેચમાં ૫મી વખત પાંચ વિકેટ લેવાની સિદ્ધિ મેળવી છે. આ સાથે તે ટેસ્ટ ક્રિકેટમાં સૌથી વધુ પાંચ વિકેટ લેનાર ડાબા હાથનો કાંડા સ્પિનર બન્યો છે.
સિરિયલ નંબર પ્લેયર કન્ટ્રી ટેસ્ટ મેચ ૫ વિકેટ
૧ કુલદીપ યાદવ ભારત ૧૫ ૫
૨ જોની વોર્ડલી ઇંગ્લેન્ડ ૨૮ ૫
૩ પોલ એડમ્સ દક્ષિણ આફ્રિકા ૪૫ ૪
કુલદીપે આ સિદ્ધિ મેળવવામાં ઇંગ્લેન્ડના દિગ્ગજ સ્પિનર જોની વોર્ડલીને પાછળ છોડી દીધા છે, જેમણે આટલી જ ફાઇફર લેવા માટે ૨૮ ટેસ્ટ મેચ રમી હતી. કુલદીપે અડધાથી પણ ઓછી મેચોમાં આ સિદ્ધિ હાંસલ કરીને વિશ્વમાં પોતાનું નંબર ૧ સ્થાન સ્થાપિત કર્યું છે.
માર્ચ ૨૦૧૭ માં ઓસ્ટ્રેલિયા સામે ડેબ્યૂ કર્યા પછી, કુલદીપને છેલ્લા આઠ વર્ષમાં માત્ર ૧૫ ટેસ્ટની મર્યાદિત તકો મળી છે. તેમ છતાં, તેણે અત્યાર સુધીમાં ૨૧.૦૯ ની શાનદાર સરેરાશથી ૬૫ વિકેટ ઝડપી છે.
જોકે, કુલદીપને ઇંગ્લેન્ડ સામેની તાજેતરની પાંચ મેચની ટેસ્ટ શ્રેણીમાં એક પણ મેચ રમવા મળી ન હતી. પરંતુ જ્યારે પણ તેને મેદાન પર આવવાની તક મળી છે, ત્યારે તેણે પોતાની સ્પિન બોલિંગનો જાદુ ફેલાવ્યો છે.