ઓડેન્સ : ડેનમાર્ક ઓપન બેડમિન્ટન ટુર્નામેન્ટમાં ભારતીય ખેલાડીઓએ ધમાકેદાર પ્રદર્શન કરીને ક્વાર્ટર ફાઇનલમાં સ્થાન નિશ્ચિત કર્યું છે, જેનાથી દેશના બેડમિન્ટન ચાહકોમાં ઉત્સાહનો માહોલ છે!

લક્ષ્ય સેને ઘરઆંગણાના ખેલાડીને હરાવ્યો!
સ્ટાર શટલર લક્ષ્ય સેને ગઈકાલે મેન્સ સિંગલ્સના રાઉન્ડ ઓફ 16માં જોરદાર લડત આપીને ડેનમાર્કના જ મનપસંદ ખેલાડી એન્ડર્સ એન્ટોનસેનને માત આપી હતી. આ વિજય સાથે લક્ષ્યએ ક્વાર્ટર ફાઇનલમાં પ્રવેશ કર્યો છે. આજે બપોરે તે ફ્રાન્સના એલેક્સ લેનિયર સામે ટકરાશે. આ હાઈ-વોલ્ટેજ મેચ ભારતીય સમયાનુસાર સાંજે 5:10 વાગ્યે શરૂ થશે.

સાત્વિક-ચિરાગની સિક્સર!
મેન્સ ડબલ્સમાં, વિશ્વની શ્રેષ્ઠ જોડીઓમાંની એક, સાત્વિકસાઈરાજ રેન્કીરેડ્ડી અને ચિરાગ શેટ્ટી (છઠ્ઠા ક્રમાંકિત) એ પણ પોતાનો દબદબો જાળવી રાખ્યો છે. તેમણે ગઈકાલે ચાઇનીઝ તાઈપેઈના યાંગ પો-હાન અને લિયુ કુઆંગ-હેંગને હરાવીને આસાનીથી ક્વાર્ટર ફાઇનલમાં જગ્યા બનાવી લીધી છે. આજે બપોરે આ ભારતીય જોડી ઇન્ડોનેશિયાના મુહમ્મદ રિયાન આર્ડિયાન્ટો અને રહેમત હિદાયતની જોડી સામે ટકરાશે. આ મહત્વની મેચ સાંજે 4:30 વાગ્યે શરૂ થવાની છે.

આજે ભારતીય ચાહકોની નજર આ બંને મેચો પર રહેશે, જ્યાં આપણા શટલરો સેમિ-ફાઇનલમાં પહોંચવા માટે પૂરતો પ્રયાસ કરશે!