નવી દિલ્હી :  ભારત અને ન્યુઝીલેન્ડની મહિલા ટીમો વચ્ચે રમાયેલા વર્લ્ડ કપ મુકાબલામાં ભારતે ડીએલએસ નિયમ હેઠળ ૫૩ રનથી શાનદાર વિજય મેળવીને સેમિફાઇનલમાં પોતાનું સ્થાન નિશ્ચિત કરી લીધું છે. આ જીતની ઉજવણીમાં સૌથી ખાસ પળ હતી ભારતીય ઓપનર સ્મૃતિ મંધાનાને મળેલો 'બેસ્ટ ફિલ્ડર' મેડલ.

સદી ફટકાર્યા પછી ફિલ્ડિંગમાં પણ કમાલ
નવી મુંબઈના ડીવાય પાટિલ સ્ટેડિયમમાં રમાયેલી આ મેચમાં સ્મૃતિ મંધાનાએ બેટિંગમાં તો કમાલ કરીને ૧૦૯ રનની શાનદાર સદી ફટકારી જ હતી, પણ ફિલ્ડિંગમાં પણ તેણે ત્રણ મહત્ત્વપૂર્ણ કેચ પકડીને ભારતની જીતમાં મોટી ભૂમિકા ભજવી હતી.

મેચ બાદ ડ્રેસિંગ રૂમમાં ટીમના ફિલ્ડિંગ કોચ મુનીશ બાલીએ જ્યારે મંધાનાને આ પ્રતિષ્ઠિત મેડલ આપ્યો, ત્યારે આ ક્ષણ બે કારણે ચર્ચામાં આવી:

૧. મંધાનાને પ્રથમવાર 'બેસ્ટ ફિલ્ડર'નો મેડલ મળ્યો.

૨. તેની સાથી ખેલાડી જેમિમાહ રોડ્રિગ્સની મજેદાર પ્રતિક્રિયા.

જેમિમાની કમેન્ટ પર આખી ટીમ હસી પડી
મેડલ મળવાના આ પ્રસંગે ટીમની મજેદાર ખેલાડી જેમિમાહ રોડ્રિગ્સે મંધાનાને મજાકમાં ચીડવતા કહ્યું:
"આ છોકરી તો ઘણા દિવસોથી બાલી સરને કહી રહી હતી કે મને મેડલ આપો, મને મેડલ આપો. પણ આજે ખરેખર તેણે મહેનતથી મેડલ હાંસલ કર્યો છે!"

જેમિમાની આ મજેદાર કમેન્ટ પર આખી ટીમ હસી પડી હતી.

મંધાનાએ પણ પોતાની ખુશી વ્યક્ત કરતા કહ્યું, "ટીમમાં જ્યારથી મેડલ આપવાનું શરૂ થયું છે, અઢી વર્ષ થઈ ગયા, પહેલીવાર મળ્યો છે."

બીસીસીઆઈ વિમેને ડ્રેસિંગ રૂમનો આ વીડિયો જાહેર કર્યો છે, જે સોશિયલ મીડિયા પર ઘણો વાયરલ થઈ રહ્યો છે. હવે ટીમ ઇન્ડિયાની નજર લીગ સ્ટેજના તેમના આખરી મુકાબલા પર છે, જ્યાં તેઓ રવિવારે નવી મુંબઈમાં બાંગ્લાદેશ સામે ટકરાશે.