નવી દિલ્હી તા.૨૬ : આઇસીસી (ICC) મહિલા વર્લ્ડ કપ 2025 હવે તેના અંતિમ તબક્કા તરફ આગળ વધી રહ્યો છે. આઇસીસીએ વર્લ્ડ કપ સેમિફાઇનલનું સત્તાવાર સમયપત્રક જાહેર કરી દીધું છે, જે મુજબ સેમિફાઇનલમાં ભારતનો મુકાબલો ઓસ્ટ્રેલિયા સામે થશે. આ સાથે જ ઓસ્ટ્રેલિયા, દક્ષિણ આફ્રિકા, ઇંગ્લેન્ડ અને ભારત - એમ ચાર ટીમોએ સેમિફાઇનલ માટે ક્વોલિફાય કર્યું છે.

25 ઓક્ટોબર, રવિવારના રોજ ઓસ્ટ્રેલિયા અને દક્ષિણ આફ્રિકા વચ્ચેની મેચ બાદ સેમિફાઇનલનું ચિત્ર સ્પષ્ટ થયું હતું. આ મેચ પછી, આઇસીસીએ શેડ્યૂલની પુષ્ટિ કરી કે, ભારત મહિલા વર્લ્ડ કપની બીજી સેમિફાઇનલમાં ઓસ્ટ્રેલિયન ટીમ સામે ટકરાશે.

વર્લ્ડ કપ સેમિફાઇનલનું સંપૂર્ણ સમયપત્રક

મહિલા વર્લ્ડ કપની પ્રથમ સેમિફાઇનલ 29 ઓક્ટોબર, બુધવારના રોજ ઇંગ્લેન્ડ અને દક્ષિણ આફ્રિકા વચ્ચે રમાશે. આ મેચ ગુવાહાટીના બારસાપારા ક્રિકેટ સ્ટેડિયમ ખાતે યોજાશે.

બીજી સેમિફાઇનલ ભારત અને ઓસ્ટ્રેલિયા વચ્ચે 30 ઓક્ટોબર, ગુરુવારના રોજ રમાશે. આ ભવ્ય મુકાબલો ડો. ડીવાય પાટિલ સ્પોર્ટ્સ એકેડેમી ખાતે યોજાશે.

બંને સેમિફાઇનલ મેચો ભારતીય સમયાનુસાર બપોરે 3 વાગ્યે શરૂ થશે.

સેમિફાઇનલ તારીખ મેચ સ્થળ

પ્રથમ સેમિફાઇનલ બુધવાર, 29 ઑક્ટોબર ઇંગ્લેન્ડ વિરુદ્ધ દક્ષિણ આફ્રિકા ગુવાહાટી

બીજી સેમિફાઇનલ ગુરુવાર, 30 ઑક્ટોબર ભારત વિરુદ્ધ ઑસ્ટ્રેલિયા મુંબઈ (ડો. ડીવાય પાટિલ સ્પોર્ટ્સ એકેડેમી)

ભારત-ઓસ્ટ્રેલિયાનો મુકાબલો કેમ?

વર્લ્ડ કપ 2025ના પોઈન્ટ ટેબલમાં ઓસ્ટ્રેલિયા 13 પોઈન્ટ સાથે ટોચ પર છે. આઇસીસીના નિયમો અનુસાર, પોઈન્ટ ટેબલમાં નંબર વન ટીમ ચોથા ક્રમાંકિત ટીમ સામે સેમિફાઇનલ રમશે.

લીગ તબક્કામાં ભારત હાલમાં ચોથા ક્રમે છે. જોકે ભારતની બાંગ્લાદેશ સામેની એક મેચ બાકી છે, પરંતુ ટીમ ઇન્ડિયા આ મેચ જીતે તો પણ 8 પોઈન્ટ સાથે ચોથા સ્થાને જ રહેશે, કારણ કે ઇંગ્લેન્ડ હાલમાં 9 પોઈન્ટ સાથે ત્રીજા સ્થાને છે.

આઇસીસીના નિયમો મુજબ, બીજી સેમિફાઇનલ મેચ પોઈન્ટ ટેબલમાં બીજા ક્રમે રહેલી ટીમ અને ત્રીજા ક્રમે રહેલી ટીમ વચ્ચે રમાશે. આ કારણોસર, પ્રથમ સેમિફાઇનલ દક્ષિણ આફ્રિકા (નંબર 2) અને ઇંગ્લેન્ડ (નંબર 3) વચ્ચે અને બીજી સેમિફાઇનલ ઑસ્ટ્રેલિયા (નંબર 1) અને ભારત (નંબર 4) વચ્ચે યોજાશે.