ન્યુઝીલેન્ડ ક્રિકેટ (NZC) અને વિશ્વભરના ક્રિકેટ ચાહકો માટે એક આશ્ચર્યજનક સમાચાર આવ્યા છે. ન્યુઝીલેન્ડના સ્ટાર બેટ્સમેન અને પૂર્વ કેપ્ટન કેન વિલિયમસને T20 આંતરરાષ્ટ્રીય ક્રિકેટમાંથી નિવૃત્તિની જાહેરાત કરી છે. માત્ર ચાર મહિના પછી યોજાનારા 2026 T20 વર્લ્ડ કપ પહેલા તેમનો આ નિર્ણય 'બ્લેક કેપ્સ' માટે મોટો આંચકો છે.
વર્ષ 2011માં T20I ડેબ્યૂ કરનાર અને 75 મેચોમાં કેપ્ટનશીપ કરનાર 35 વર્ષીય વિલિયમસને આ ફોર્મેટમાં ન્યુઝીલેન્ડને મોટી ઊંચાઈઓ પર પહોંચાડ્યું છે.
 કેપ્ટનશીપમાં સિદ્ધિ: તેમના નેતૃત્વમાં ન્યુઝીલેન્ડની ટીમ 2016 અને 2022 T20 વર્લ્ડ કપની સેમિફાઇનલમાં પહોંચી હતી, અને 2021માં તો ફાઇનલ સુધીની સફર ખેડી હતી.
 અદ્ભુત આંકડા: તે ન્યુઝીલેન્ડ માટે બીજા ક્રમના સૌથી વધુ T20I રન બનાવનાર ખેલાડી છે. તેમણે 93 મેચમાં 33ની સરેરાશથી 2575 રન બનાવ્યા છે, જેમાં 18 અડધી સદી સામેલ છે.
નિવૃત્તિની જાહેરાત કરતી વખતે કેન વિલિયમસન ભાવુક જોવા મળ્યા હતા, પરંતુ તેમનો નિર્ણય ટીમ અને ભવિષ્યની જરૂરિયાતને ધ્યાનમાં રાખીને લેવાયો છે.
 કેન વિલિયમસન કહયું કે  "હું લાંબા સમયથી આ ફોર્મેટનો ભાગ છું... હવે મને લાગે છે કે મારા અને ટીમ બંને માટે આ યોગ્ય સમય છે. આનાથી ટીમને આગામી T20 વર્લ્ડ કપની તૈયારી માટે સ્પષ્ટતા મળશે."
વિલિયમસને વર્તમાન કેપ્ટન મિશેલ સેન્ટનર અને યુવા ટીમ પર વિશ્વાસ વ્યક્ત કર્યો, અને કહ્યું કે આ સમયગાળો યુવા ખેલાડીઓ માટે આગળ વધવા અને વર્લ્ડ કપની તૈયારી કરવા માટે મહત્ત્વપૂર્ણ છે.
ભલે કેન વિલિયમસન હવે T20I ક્રિકેટમાં જોવા નહીં મળે, પરંતુ ક્રિકેટ ચાહકોને હજી પણ આશા છે કે તે ODI અને ટેસ્ટ ફોર્મેટમાં પોતાનો જાદુ ચાલુ રાખશે.