નવી દિલ્હી: બાંગ્લાદેશ ક્રિકેટ બોર્ડ (BCB) ભૂતપૂર્વ મહિલા ટીમ કેપ્ટન જહાંઆરા આલમ દ્વારા લગાવવામાં આવેલા આરોપોની તપાસ માટે એક સમિતિની રચના કરશે. બોર્ડે સમિતિને 15 કાર્યકારી દિવસોમાં તેના તારણો અને ભલામણો રજૂ કરવાનો નિર્દેશ આપ્યો છે. જહાંઆરાએ ભૂતપૂર્વ મુખ્ય પસંદગીકાર અને ટીમ મેનેજર મંજરુલ ઇસ્લામ સામે જાતીય સતામણીના ગંભીર આરોપો લગાવ્યા છે. BCB દ્વારા જારી કરાયેલા એક નિવેદનમાં કહેવામાં આવ્યું છે કે, "બાંગ્લાદેશ ક્રિકેટ બોર્ડ (BCB) એ બાંગ્લાદેશ રાષ્ટ્રીય મહિલા ક્રિકેટ ટીમના ભૂતપૂર્વ સભ્ય દ્વારા ટીમ સાથે સંકળાયેલા કેટલાક વ્યક્તિઓ દ્વારા કથિત ગેરવર્તણૂક અંગે લગાવવામાં આવેલા આરોપો પર ચિંતા વ્યક્ત કરી છે. આ મામલો સંવેદનશીલ હોવાથી, BCB એ આરોપોની તપાસ માટે એક સમિતિ બનાવવાનો નિર્ણય લીધો છે. સમિતિ 15 કાર્યકારી દિવસોમાં તેના તારણો અને ભલામણો રજૂ કરશે." નિવેદનમાં કહેવામાં આવ્યું છે કે, "BCB તેના તમામ ખેલાડીઓ અને સ્ટાફ માટે સલામત, આદરણીય અને વ્યાવસાયિક વાતાવરણ સુનિશ્ચિત કરવા માટે પ્રતિબદ્ધ છે. બોર્ડ આવા મામલાઓને ખૂબ જ ગંભીરતાથી લે છે અને તપાસના તારણોના આધારે યોગ્ય પગલાં લેશે." પત્રકાર રિયાસાદ અઝીમ સાથેની મુલાકાતમાં જહાનારાએ ખુલાસો કર્યો હતો કે ટીમ મેનેજર મંજરુલ ઇસ્લામે તેની સાથે અયોગ્ય વર્તન કર્યું હતું. તે પરવાનગી વિના તેના ખભા પર હાથ રાખતો અને વ્યક્તિગત ટિપ્પણી કરતો જેનાથી તેણી અસ્વસ્થતા અનુભવતી. ભૂતપૂર્વ પસંદગીકાર અને મેનેજર તેના સાથી ખેલાડીઓ અને અન્ય અધિકારીઓની હાજરી હોવા છતાં, હાથ મિલાવવાને બદલે તેને ગળે લગાવવા માટે તેની પાસે જતા.જહાનારાના જણાવ્યા મુજબ, તેણીએ આ અંગે BCBના ભૂતપૂર્વ ડિરેક્ટર શફિઉલ ઇસ્લામ નડેલ અને બોર્ડના મુખ્ય કાર્યકારી અધિકારી નિઝામુદ્દીન ચૌધરીને ફરિયાદ કરી હતી.ભારતમાં મહિલા T20 ચેલેન્જ અને ફેરબ્રેક ઇન્વિટેશનલ T20 જેવી ટુર્નામેન્ટમાં ભાગ લેનારી એકમાત્ર બાંગ્લાદેશી ખેલાડી જહાનારા આલમે બાંગ્લાદેશ માટે 52 ODI માં 30.39 ની સરેરાશથી 48 વિકેટ લીધી છે, જ્યારે 83 T20 માં, તેણીએ 24.03 ની સરેરાશથી 60 વિકેટ લીધી છે.