નવી દિલ્હી : ભારતીય ક્રિકેટ કંટ્રોલ બોર્ડ (BCCI) દ્વારા વરિષ્ઠ ખેલાડીઓ માટે ઘરેલુ ક્રિકેટ રમવા અંગેના કડક વલણની સીધી અસર જોવા મળી રહી છે. સૂત્રોના જણાવ્યા અનુસાર, BCCIએ ટેસ્ટ અને T20 ક્રિકેટમાંથી સંન્યાસ લઈ ચૂકેલા વિરાટ કોહલી અને રોહિત શર્માને સ્પષ્ટ સંદેશ આપ્યો છે કે, જો તેમણે વન-ડે ટીમમાં (ODI Team) પોતાની જગ્યા જાળવી રાખવી હશે, તો ઘરેલુ ક્રિકેટ રમવું ફરજિયાત રહેશે. બોર્ડની આ બે-ટૂંક વાતચીત બાદ ક્રિકેટ જગતમાં હલચલ મચી ગઈ છે.

આ સખત ફરમાનના પરિણામે, ભારતીય ટીમના કેપ્ટન રોહિત શર્માએ તાત્કાલિક નિર્ણય લીધો છે. તેમણે મુંબઈ ક્રિકેટ એસોસિએશન (MCA) ને આગામી વિજય હઝારે ટ્રોફીમાં પોતાની ઉપલબ્ધતા વિશે જાણ કરી દીધી છે, જે દર્શાવે છે કે તે ફોર્મ અને ફિટનેસ જાળવી રાખવા માટે સ્થાનિક મેચો રમશે. જોકે, બીજી તરફ, પૂર્વ કેપ્ટન વિરાટ કોહલીની આ ટુર્નામેન્ટમાં ભાગીદારી અંગે હજી સુધી કોઈ સત્તાવાર માહિતી કે સ્પષ્ટતા આવી નથી, જેના કારણે તેના ચાહકોમાં સસ્પેન્સ જળવાયેલો છે. BCCIએ સ્પષ્ટ કર્યું છે કે હવે માત્ર ખેલાડીનું નામ કે તેની જૂની સિદ્ધિઓ આંતરરાષ્ટ્રીય ટીમમાં પસંદગીની ગેરંટી નહીં આપે.