કોલકાતા: ભારત અને દક્ષિણ આફ્રિકા વચ્ચે કોલકાતામાં રમાયેલી પ્રથમ ટેસ્ટ મેચમાં ટીમ ઇન્ડિયાનો 30 રનથી પરાજય થયો છે. દક્ષિણ આફ્રિકાએ આ જીત સાથે ટેસ્ટ શ્રેણીમાં 1-0ની લીડ મેળવી લીધી છે. ભારતને જીતવા માટે ચોથી ઇનિંગમાં માત્ર 124 રનનો નાનો લક્ષ્યાંક મળ્યો હતો, પરંતુ મુલાકાતી ટીમના સ્પિનર સિમોન હાર્મર ભારત માટે 'ડેથ નેલ' સાબિત થયો. હાર્મરે બીજી ઇનિંગમાં 4 સહિત મેચમાં કુલ 8 વિકેટ ઝડપીને ભારતીય બેટિંગ ક્રમને ધ્વસ્ત કરી નાખ્યો.
મેચના ત્રીજા દિવસે ભારતીય બેટિંગમાં કઈ ખાસ જોવા ન મળ્યું. માર્કો જાનસને પહેલી જ ઓવરમાં યશસ્વી જયસ્વાલ (0) અને ત્રીજી ઓવરમાં કેએલ રાહુલ (1)ને આઉટ કરીને ભારતને શરૂઆતમાં જ મોટો ઝટકો આપ્યો હતો. લંચ સુધી ભારતનો સ્કોર 2 વિકેટે 10 રન હતો. જોકે, વોશિંગ્ટન સુંદર (31) અને ધ્રુવ જુરેલ (13) એ થોડો સંઘર્ષ કર્યો, પરંતુ હાર્મર અને એડેન માર્કરામની સ્પિન સામે ભારતીય બેટ્સમેનો ટકી શક્યા નહીં. હાર્મરે કુલદીપ યાદવ (1) ને LBW આઉટ કરીને દક્ષિણ આફ્રિકાને જીત અપાવી હતી.
આ પહેલાં, દક્ષિણ આફ્રિકાએ પ્રથમ દાવમાં 159 રન બનાવ્યા હતા, જેના જવાબમાં ભારતે 189 રન બનાવીને 30 રનની લીડ લીધી હતી. પરંતુ દક્ષિણ આફ્રિકાએ બીજી ઇનિંગમાં ટેમ્બા બાવુમાના 55 રન અને અન્ય ખેલાડીઓના યોગદાનથી 153 રન બનાવ્યા, જેના કારણે ભારતને 124 રનનો લક્ષ્યાંક મળ્યો હતો. ભારતીય બોલરોએ બીજી ઇનિંગમાં સારું પ્રદર્શન કર્યું હતું, જેમાં રવિન્દ્ર જાડેજાએ પોતાની સ્પિનથી પ્રોટીઝ બેટ્સમેનોને આઉટ કર્યા હતા.
જોકે, બોલિંગમાં શાનદાર પ્રદર્શન કર્યા બાદ ભારતીય બેટિંગ ક્રમે ચોથી ઇનિંગમાં નિરાશ કર્યા. 91 રનની જરૂર હતી ત્યારે ભારતનો સ્કોર 33/3 હતો અને વોશિંગ્ટન સુંદરના આઉટ થયા બાદ ભારતની જીતની આશા પણ સમાપ્ત થઈ ગઈ હતી. આ હારથી સ્પષ્ટ થાય છે કે ભારતીય બેટ્સમેનો દક્ષિણ આફ્રિકાના સ્પિનર સિમોન હાર્મરની સામે રમી શક્યા નહોતા.