સિડની (ઓસ્ટ્રેલિયા) : ભારતીય શટલરોએ સિડનીમાં ચાલી રહેલી ઑસ્ટ્રેલિયન ઓપન સુપર ૫૦૦ (US$૪૭૫,૦૦૦) બેડમિન્ટન ટુર્નામેન્ટમાં શાનદાર પ્રદર્શન કર્યું છે. મેન્સ સિંગલ્સ ઇવેન્ટમાં એચએસ પ્રણોય, આયુષ શેટ્ટી અને થરૂન માન્નેપલ્લીએ પ્રથમ રાઉન્ડના મુશ્કેલ મુકાબલા જીતીને બીજા રાઉન્ડમાં પ્રવેશ મેળવ્યો છે, જેનાથી દેશને મોટી આશાઓ જાગી છે.

પ્રોનોયનો સંઘર્ષપૂર્ણ વિજય: એશિયન ગેમ્સના બ્રોન્ઝ મેડલ વિજેતા અને ૩૩ વર્ષીય એચએસ પ્રણોયે પ્રથમ રાઉન્ડમાં વિશ્વના ૮૫મા ક્રમાંકિત જોહાન્સ સોટ માર્સેલિનો સામે શરૂઆતમાં સંઘર્ષ કર્યો હતો. પ્રથમ ગેમમાં ૬-૨૧થી હારી ગયા બાદ પ્રણોયે પોતાની રણનીતિ બદલી, સંયમ જાળવ્યો અને પોતાનો બચાવ મજબૂત બનાવ્યો. ૫૭ મિનિટની આ રોમાંચક મેચમાં તેમણે બાકીની બે ગેમ્સ ૨૧-૧૨, ૨૧-૧૭થી જીતીને શાનદાર કમબેક વિજય મેળવ્યો.

૨૦૨૩ના રનર-અપ એચએસ પ્રણોયનો મુકાબલો હવે બીજા રાઉન્ડમાં આઠમા ક્રમાંકિત ઇન્ડોનેશિયાના અલ્વી ફરહાન સામે થશે.
 
યુવા શટલરોનું પ્રભાવશાળી પ્રદર્શન: બીજી તરફ, કર્ણાટકના ૨૦ વર્ષીય યુવા ખેલાડી આયુષ શેટ્ટીએ BWF ટૂરમાં પોતાની પ્રભાવશાળી શરૂઆત ચાલુ રાખી. આ વર્ષની શરૂઆતમાં યુએસ ઓપનમાં સુપર ૩૦૦ ટાઇટલ જીત્યા બાદ, વિશ્વના ૩૨મા ક્રમાંકિત ખેલાડીએ કેનેડાના સેમ યુઆનને માત્ર ૩૩ મિનિટમાં સીધા સેટમાં ૨૧-૧૧, ૨૧-૧૫થી હરાવ્યો. ૨૦૨૩ના વર્લ્ડ જુનિયર ચેમ્પિયનશિપના બ્રોન્ઝ મેડલ વિજેતા આયુષનો મુકાબલો હવે કોડાઈ નારોકા અને ઝિયાઓડોંગ શેંગ વચ્ચેની મેચના વિજેતા સામે થશે.

વળી, ૨૦૨૩ના નેશનલ ગેમ્સના ગોલ્ડ મેડલ વિજેતા થરૂન માન્નેપલ્લીએ ડેનમાર્કના મેગ્નસ જોહાનસન સામે ૬૬ મિનિટ સુધી ચાલેલા મુકાબલામાં ૨૧-૧૩, ૧૭-૨૧, ૨૧-૧૯થી જીત મેળવી. થરૂન હવે પાંચમા ક્રમાંકિત ચાઇનીઝ તાઈપેઈના લિન ચુન-યી સામે ટકરાશે.

આ દરમિયાન, ભારતના કિરણ જ્યોર્જ છઠ્ઠા ક્રમાંકિત જાપાનના કેન્ટા નિશિમોટો સામે ૨૧-૧૧, ૨૨-૨૪, ૧૭-૨૧ થી હારીને બહાર થઈ ગયો છે. હવે દેશની આશા ટોચના ખેલાડીઓ લક્ષ્ય સેન અને કિદામ્બી શ્રીકાંત પર છે, જેઓ ટૂંક સમયમાં પોતાનું અભિયાન શરૂ કરશે.