ગુવાહાટી, તા.૨૦

ભારત અને દક્ષિણ આફ્રિકા વચ્ચે બે મેચની ટેસ્ટ સિરીઝ ચાલી રહી છે. સિરીઝની બીજી મેચ ૨૨ નવેમ્બરથી શરૃ થશે. ક્રિકઇન્ફોના અહેવાલ મુજબ, ભારતીય કેપ્ટન શુભમન ગિલ તેની ગરદનની ઇજામાંથી બહાર આવ્યો નથી. પરિણામે, તે ગુવાહાટીમાં આગામી ટેસ્ટ મેચમાંથી બહાર થઈ ગયો છે. ડાબોડી વિકેટકીપર-બેટ્સમેન પંત કેપ્ટન તરીકે જવાબદારી સંભાળશે.

કોલકાતામાં પ્રથમ ટેસ્ટ દરમિયાન શુભમન ગિલને ગરદનની ઇજા થઈ હતી. પ્રથમ ઇનિંગમાં માત્ર ત્રણ બોલ રમ્યા બાદ તે રિટાયર્ડ હર્ટ થયો હતો. તે બીજી ઇનિંગમાં બેટિંગ કરી શક્યો નહોતો અને તેને હોસ્પિટલમાં દાખલ કરવામાં આવ્યો હતો. ગિલ હવે બીજી મેચમાંથી પણ બહાર થઈ ગયો છે. ડોકટરો માને છે કે બીજી ટેસ્ટ રમવાથી જોખમ વધી શકે છે.

ભારત અને દક્ષિણ આફ્રિકા વચ્ચેની બીજી ટેસ્ટમાંથી ગિલ બહાર થયા બાદ રિષભ પંત ટીમના કેપ્ટન તરીકે જવાબદારી સંભાળશે. વધુમાં ગિલના સ્થાને સાઈ સુદર્શન અથવા દેવદત્ત પડિકલનો વિચાર કરી શકાય છે. બંને ખેલાડીઓએ ભારત માટે ટેસ્ટ ડેબ્યૂ કર્યું છે. ગિલના બહાર થવાથી પડિકલ અથવા સુદર્શન પહેલી પસંદગી હોઈ શકે છે.

ભારતીય ટીમ કોલકાતામાં પ્રથમ મેચ ૩૦ રનથી હારી ગઈ. દક્ષિણ આફ્રિકાએ પ્રથમ બેટિંગ કરતા ૫૫ ઓવરમાં ૧૫૯ રન બનાવ્યા. જવાબમાં ભારતીય ટીમે પ્રથમ ઇનિંગમાં ૬૨.૨ ઓવરમાં ૧૮૯ રન બનાવીને ૩૦ રનની લીડ મેળવી. ત્યારબાદ દક્ષિણ આફ્રિકાએ બીજી ઇનિંગમાં ૫૪ ઓવરમાં ૧૫૩ રન બનાવ્યા, જેના જવાબમાં ભારતીય ટીમ ૯૩ રનમાં ઓલઆઉટ થઈ ગઈ. દક્ષિણ આફ્રિકાએ મેચ ૩૦ રનથી જીતી અને સિરીઝમાં ૧-૦થી લીડ મેળવી છે.