દોહા: કતર - કતરના દોહામાં આજે મેન્સ T20 એશિયા કપ રાઇઝિંગ સ્ટાર્સ ૨૦૨૫ની ફાઇનલ મેચ રમાશે, જ્યાં એશિયન ક્રિકેટના બે કટ્ટર હરીફો, પાકિસ્તાન અને બાંગ્લાદેશ ટાઇટલ માટે ટકરાશે. ભારતીય સમય અનુસાર રાત્રે ૮ વાગ્યે શરૂ થનારી આ મેચમાં એક તરફ જુનો ચેમ્પિયન પાકિસ્તાન છે, જે ત્રીજી વખત આ ટાઇટલ જીતનાર પહેલી ટીમ બનવાની તક ધરાવે છે. તો બીજી તરફ નવું દાવેદાર બાંગ્લાદેશ પોતાનું પ્રથમ ટાઇટલ જીતવા પર નજર રાખી રહ્યું છે. આ મેચ એશિયાના યુવા પ્રતિભાઓ માટે સર્વશ્રેષ્ઠતા સાબિત કરવાની સુવર્ણ તક છે.
ફાઇનલમાં પહોંચવા માટે બંને ટીમોએ રોમાંચક સેમિફાઇનલ મેચો જીતી છે. બાંગ્લાદેશે તેની પહેલી સેમિફાઇનલ મેચમાં ભારતને હરાવીને સૌને ચોંકાવી દીધા હતા. આ મેચમાં બાંગ્લાદેશે ભારતને સુપરઓવરમાં હરાવીને ફાઇનલમાં પ્રવેશ કર્યો હતો, જે તેના આત્મવિશ્વાસને નવી ઊંચાઈ આપશે. બીજી તરફ, પાકિસ્તાને તેની અનુભવી બોલિંગ લાઇન-અપના આધારે શ્રીલંકા સામે પાંચ રનથી રોમાંચક જીત નોંધાવી હતી. પાકિસ્તાને ૧૫૩ રનનો સાધારણ સ્કોર ડિફેન્ડ કરીને બતાવ્યું કે તેની પાસે દબાણ હેઠળ મેચ જીતવાની ક્ષમતા છે.
ઇમર્જિંગ એશિયા કપ તરીકે ૨૦૧૩થી જાણીતી આ ટુર્નામેન્ટમાં પાકિસ્તાનનો દબદબો રહ્યો છે. પાકિસ્તાન ૪ વખત ફાઇનલ મેચ રમ્યું છે અને ૨૦૧૯ તથા ૨૦૨૩નું ટાઇટલ જીતી ચૂક્યું છે. બાંગ્લાદેશ બીજી વખત ફાઇનલમાં પહોંચ્યું છે. રસપ્રદ વાત એ છે કે, બાંગ્લાદેશે તેની પહેલી ફાઇનલ મેચ ૨૦૧૯માં પાકિસ્તાન સામે જ રમી હતી અને ત્યારે તેને ૭૭ રનથી કારમી હારનો સામનો કરવો પડ્યો હતો. આજે બાંગ્લાદેશ પાસે માત્ર પ્રથમ ટાઇટલ જીતવાની જ નહીં, પરંતુ ૨૦૧૯ની એ હારનો બદલો લેવાની પણ મોટી તક છે.
T20 એશિયા કપ રાઇઝિંગ સ્ટાર્સ ટૂર્નામેન્ટ એશિયન ક્રિકેટ બોર્ડ્સ માટે તેમના યુવા પ્રતિભાઓને આંતરરાષ્ટ્રીય સ્તરનું પ્રદર્શન કરવા માટેનું મુખ્ય પ્લેટફોર્મ છે. આ મેચમાં બંને ટીમોના યુવા ખેલાડીઓ પર નજર રહેશે, જેઓ ભવિષ્યમાં તેમની સિનિયર ટીમોનું પ્રતિનિધિત્વ કરી શકે છે. પાકિસ્તાન માટે જ્યાં ત્રીજી વખત ટાઇટલ જીતીને એશિયન ક્રિકેટમાં પોતાનો દબદબો જાળવી રાખવાનો પડકાર છે, ત્યાં બાંગ્લાદેશ માટે ક્રિકેટના આ સ્તરે પ્રથમ વખત ચેમ્પિયન બનવાનો સુવર્ણ અવસર છે.