બેંગ્લોર:રોયલ ચેલેન્જર્સ બેંગ્લોર (RCB)ના પૂર્વ કેપ્ટન અને દક્ષિણ આફ્રિકાના સ્ટાર બેટ્સમેન ફાફ ડુ પ્લેસિસે તેમના ભારતીય ક્રિકેટ ચાહકોને આશ્ચર્યચકિત કરતો મોટો નિર્ણય લીધો છે. તેમણે આગામી IPL ૨૦૨૬ની સીઝનની હરાજીમાંથી પોતાનું નામ પાછું ખેંચી લીધું છે અને જાહેરાત કરી છે કે તેઓ હવે પાકિસ્તાન સુપર લીગ (PSL) માં ભાગ લેશે.
ડુ પ્લેસિસે સોશિયલ મીડિયા પર આ અંગે પોસ્ટ કરીને માહિતી આપી હતી. તેમની આ જાહેરાત બાદ ક્રિકેટ જગતમાં અને ખાસ કરીને સોશિયલ મીડિયા પર મોટી ચર્ચા શરૂ થઈ ગઈ છે કે શું તેમણે આઇપીએલ છોડી દીધી છે.
IPL સાથેના ૧૪ વર્ષના સંબંધોનો અંત: ફાફ ડુ પ્લેસિસે પોતાની પોસ્ટમાં IPL સાથેના તેમના ૧૪ વર્ષના જોડાણને યાદ કર્યું. તેમણે લખ્યું: "૧૪ સીઝન પછી, હું આગામી IPL હરાજીમાંથી મારું નામ પાછું ખેંચી રહ્યો છું. આ લીગ મારા માટે ખૂબ જ ખાસ રહી છે. મને વિશ્વ કક્ષાના સાથી ખેલાડીઓ સાથે રમવાની, ફક્ત એક જ નહીં, પરંતુ ઘણી મહાન ફ્રેન્ચાઇઝીઓ સાથે રમવાની અને ચાહકો સામે રમવાની તક મળી જેમના માટે રમત એક જુસ્સાથી ઓછી નથી."
ડુ પ્લેસિસે ભાવુક થતાં જણાવ્યું કે, "લીગમાં ૧૪ વર્ષ ખૂબ લાંબો સમય હતો, અને હું ગર્વથી કહી શકું છું કે તે મારા જીવનનો શ્રેષ્ઠ ભાગ હતો. ભારત મારા હૃદયની ખૂબ નજીક છે અને તેનું વિશેષ મહત્વ છે. આ ગુડબાય નથી, અને તમે મને ફરીથી મળશો."
PSLમાં રમવાનો નિર્ણય: એક તરફ જ્યાં ફાફ ડુ પ્લેસિસે IPLમાંથી ખસી જવાની જાહેરાત કરી, ત્યાં તેમણે તુરંત જ પોતાનો નવો પડકાર પણ જાહેર કર્યો. તેમણે ઉમેર્યું, "આ વર્ષે, મેં એક નવો નિર્ણય લીધો છે અને એક નવો પડકાર લીધો છે. હું પાકિસ્તાન સુપર લીગ (PSL)માં ભાગ લઈશ. આ મારા માટે એક નવું પગલું છે અને અનુભવ કરવા માટે કંઈક નવું છે. એક નવો દેશ, એક નવું વાતાવરણ, એક નવો પડકાર. ટૂંક સમયમાં મળીશું."
ફાફ ડુ પ્લેસિસે અત્યાર સુધી IPLમાં કુલ ૧૫૪ મેચ રમી છે, જેમાં તેમણે ૪,૭૭૩ રન બનાવ્યા છે અને ૩૯ અડધી સદી ફટકારી છે