રાંચી, તા.02: ભારત અને દક્ષિણ આફ્રિકા વચ્ચેની રાંચી વનડે મેચમાં ભારતની શાનદાર જીત બાદ, ટીમ ઇન્ડિયાના ડ્રેસિંગ રૂમમાં બધું બરાબર ન હોવાની અટકળોએ જોર પકડ્યું છે. સોશિયલ મીડિયા પર વાયરલ થયેલા એક વીડિયોમાં રાંચીની હોટેલ લોબીમાં મુખ્ય કોચ ગૌતમ ગંભીર અને ભૂતપૂર્વ કેપ્ટન રોહિત શર્મા વચ્ચે કોઈ ગંભીર વાતચીત ચાલી રહી હોય તેવું જોવા મળ્યું હતું. આ દ્રશ્યોએ ચાહકોમાં ચિંતા જગાવી છે.
વિરાટ કોહલીએ ઉજવણી ટાળી
વધતા તણાવના સંકેત આપતા એક મહત્ત્વનો બનાવ પણ સામે આવ્યો છે: કેએલ રાહુલ હોટેલની લોબીમાં જીતની ખુશીમાં કેક કાપી રહ્યો હતો, પરંતુ વિરાટ કોહલીએ આ ઉજવણીમાં જોડાવાનો સ્પષ્ટ ઇનકાર કર્યો હતો. ચાહકો અને હોટેલ સ્ટાફની વિનંતીઓ છતાં, કોહલી અટક્યો નહોતો અને હાથના ઇશારાથી તેણે ભાગ લેવાની અનિચ્છા દર્શાવી હતી.
કેટલાક મીડિયા અહેવાલો દાવો કરી રહ્યા છે કે કોચ ગૌતમ ગંભીર અને બે સિનિયર ખેલાડીઓ, રોહિત શર્મા અને વિરાટ કોહલી વચ્ચેના સંબંધો એટલા સારા નથી જેટલા હોવા જોઈએ.
BCCI ચિંતિત, મોટી બેઠકની સંભાવના
અહેવાલો અનુસાર, BCCI પણ ટીમ ઇન્ડિયામાં ચાલી રહેલા આ તણાવ અંગે ચિંતિત છે. એવો દાવો કરવામાં આવ્યો છે કે બીજી કે ત્રીજી વનડે પહેલા મેનેજમેન્ટ આ ત્રણેય મહત્ત્વના વ્યક્તિઓ સાથે એક મોટી બેઠક યોજી શકે છે, જેમાં રોહિત અને કોહલીના ભવિષ્ય અંગે પણ ચર્ચા થઈ શકે છે.
નોંધનીય છે કે, ઓસ્ટ્રેલિયા સામેની અગાઉની ODI શ્રેણીમાં 1-2 થી હાર બાદ મુખ્ય કોચ ગૌતમ ગંભીરે નિવેદન આપ્યું હતું કે તે શ્રેણી હાર્યા પછી પણ ઉજવણી કરનારાઓમાંના નથી.