બેંગલુરુ : ભારતીય ઘરેલું ક્રિકેટ અને આઈપીએલ (IPL) ના જાણીતા ચહેરા એવા કૃષ્ણપ્પા ગૌતમે આજે ક્રિકેટના તમામ સ્વરૂપોમાંથી નિવૃત્તિની જાહેરાત કરીને ચાહકોને ચોંકાવી દીધા છે. ૧૪ વર્ષ સુધી મેદાન પર પોતાની ઓફ-સ્પિન બોલિંગ અને પાવર-હિટિંગ બેટિંગથી ધૂમ મચાવનાર ગૌતમે સોશિયલ મીડિયા પર એક ભાવુક પોસ્ટ શેર કરીને પોતાની સફરને વિરામ આપ્યો છે.
ડેબ્યૂ મેચમાં જ દિગ્ગજોને કર્યા હતા આઉટ
કૃષ્ણપ્પા ગૌતમે વર્ષ ૨૦૧૨માં ઉત્તર પ્રદેશ સામે રણજી ટ્રોફીમાં ડેબ્યૂ કર્યું હતું. પોતાની પ્રથમ મેચમાં જ તેમણે સુરેશ રૈના અને ભુવનેશ્વર કુમાર જેવા મોટા નામોને આઉટ કરીને પોતાની પ્રતિભા સાબિત કરી દીધી હતી. ૨૦૧૬-૧૭ની રણજી સીઝન તેમના કેરિયરનો ટર્નિંગ પોઈન્ટ રહી હતી, જેમાં તેમણે માત્ર ૮ મેચમાં ૨૭ વિકેટ ઝડપીને પસંદગીકારોનું ધ્યાન ખેંચ્યું હતું. તેમણે ભારત માટે એક વન-ડે મેચ પણ રમી છે, જેમાં શ્રીલંકા સામે એક વિકેટ ઝડપી હતી.
IPL હરાજીમાં બન્યા હતા 'ટોક ઓફ ધ ટાઉન'
ગૌતમનું આઈપીએલ કેરિયર અત્યંત ચર્ચાસ્પદ રહ્યું છે. ૨૦૨૧ની આઈપીએલ હરાજીમાં જ્યારે ચેન્નાઈ સુપર કિંગ્સ (CSK) એ તેમને ૯.૨૫ કરોડ રૂપિયાની માતબર રકમમાં ખરીદ્યા, ત્યારે તેઓ આઈપીએલ ઇતિહાસના સૌથી મોંઘા અનકેપ્ડ પ્લેયર બન્યા હતા. તેઓ મુંબઈ ઈન્ડિયન્સ, રાજસ્થાન રોયલ્સ, લખનઉ સુપર જાયન્ટ્સ અને પંજાબ કિંગ્સ જેવી દિગ્ગજ ટીમોનો હિસ્સો રહી ચૂક્યા છે. તેમની વિસ્ફોટક બેટિંગ શૈલીને કારણે તેઓ હારતી બાજી પલટાવવા માટે જાણીતા હતા.
ગૌતમની સફર આંકડાની નજરે
૫૯ ફર્સ્ટ-ક્લાસ મેચોમાં ગૌતમે ૨૨૪ વિકેટ લેવાની સાથે ૧૪૧૯ રન પણ બનાવ્યા છે. લિસ્ટ-એ ક્રિકેટમાં પણ ૯૬ વિકેટ તેમના નામે નોંધાયેલી છે. કર્ણાટક માટે રણજી ટ્રોફી જીતવામાં પણ તેમનો ફાળો અમૂલ્ય રહ્યો છે. નિવૃત્તિ બાદ ગૌતમે તેમના તમામ સાથી ખેલાડીઓ, કોચ અને ચાહકોનો આભાર માન્યો છે. ક્રિકેટના નિષ્ણાતો માને છે કે કૃષ્ણપ્પા ગૌતમ જેવા ઓલરાઉન્ડરની ખોટ કર્ણાટક અને આઈપીએલની ટીમોને ચોક્કસ વર્તાશે.