મેલબોર્ન  : ક્રિકેટ પ્રેમીઓ માટે અને ખાસ કરીને ઓસ્ટ્રેલિયન ફેન્સ માટે એક માઠા સમાચાર સામે આવ્યા છે. એશિઝ શ્રેણીમાં શાનદાર ફોર્મમાં ચાલી રહેલા કાંગારૂ કેપ્ટન પેટ કમિન્સ પીઠની ઈજાના કારણે હવે આખી શ્રેણીમાંથી બહાર થઈ ગયા છે. મંગળવારે ઓસ્ટ્રેલિયાના મુખ્ય કોચ એન્ડ્રુ મેકડોનાલ્ડે આ વાતની સત્તાવાર પુષ્ટિ કરી છે કે કમિન્સ હવે ત્રીજી અને ચોથી ટેસ્ટમાં રમી શકશે નહીં.
વધુ જોખમ લેવા તૈયાર નથી ટીમ મેનેજમેન્ટ
મુખ્ય કોચ મેકડોનાલ્ડે મેલબોર્નમાં પત્રકારો સાથે વાત કરતા જણાવ્યું કે, "પેટ બાકીની શ્રેણી માટે ઉપલબ્ધ રહેશે નહીં. અમે તેની વાપસી માટે ઘણા જોખમો લીધા હતા અને એડિલેડ ટેસ્ટમાં ૬ વિકેટ લઈને તેણે એશિઝ જીતવામાં મોટી ભૂમિકા ભજવી હતી. પરંતુ હવે જ્યારે અમે શ્રેણી જીતી લીધી છે, ત્યારે તેને વધુ જોખમમાં મૂકવો યોગ્ય નથી. પેટ પોતે પણ આ નિર્ણય સાથે સંમત છે."
T20 વર્લ્ડ કપ 2026 પર લટકતી તલવાર
સૌથી વધુ ચિંતાજનક બાબત એ છે કે ફેબ્રુઆરીમાં યોજાનારા T20 વર્લ્ડ કપમાં પણ કમિન્સ રમી શકશે કે નહીં તે અંગે અનિશ્ચિતતા છે. તેની પીઠની સમસ્યા એટલી ગંભીર છે કે ટૂંક સમયમાં ફરીથી તપાસ કરવામાં આવશે. કોચે કહ્યું કે, "અમે આશાવાદી છીએ પણ અત્યારે ચોક્કસ કંઈ કહી શકાય તેમ નથી. હાલમાં પરિસ્થિતિ થોડી નાજુક છે." જો કમિન્સ વર્લ્ડ કપ સુધી ફિટ નહીં થાય તો તે ઓસ્ટ્રેલિયા માટે સૌથી મોટો ફટકો સાબિત થશે.
કમિન્સે અગાઉ જ આપ્યા હતા સંકેત
એડિલેડ ટેસ્ટ દરમિયાન જ પેટ કમિન્સે પ્રેસ કોન્ફરન્સમાં પોતાની પીઠની સમસ્યાનો ઉલ્લેખ કર્યો હતો. તેણે જણાવ્યું હતું કે જૂની ઈજા ફરી ઉભરી રહી છે અને તેને લાંબા આરામની જરૂર પડી શકે છે. ઓસ્ટ્રેલિયન મેડિકલ ટીમ હવે કમિન્સના રિહેબિલિટેશન પર ધ્યાન આપી રહી છે જેથી તેને વર્લ્ડ કપ પહેલા મેદાનમાં ઉતારી શકાય.
એશિઝ જેવી પ્રતિષ્ઠિત શ્રેણી વચ્ચે કેપ્ટનનું આ રીતે બહાર થવું એ ઓસ્ટ્રેલિયા માટે ટેસ્ટમાં મોટું નુકસાન છે, પરંતુ હવે સૌની નજર 2026 ના વર્લ્ડ કપ પર મંડાયેલી છે.