ભોપાલ : મધ્યપ્રદેશની રાજધાની ભોપાલમાં રમાઈ રહેલી ૬૮મી રાષ્ટ્રીય શૂટિંગ ચેમ્પિયનશિપમાં શૂટર્સ વચ્ચે કાંટાની ટક્કર જોવા મળી રહી છે. મધ્યપ્રદેશ રાજ્ય શૂટિંગ એકેડેમી ખાતે આયોજિત આ સ્પર્ધામાં નેવીના કિરણ અંકુશ જાધવે પલકવારમાં બાજી પલટી નાખી હતી. ૧૦ મીટર એર રાઈફલ મેન્સ ફાઈનલમાં કિરણે ૨૫૨.૧ ના સ્કોર સાથે ગોલ્ડ મેડલ પોતાના નામે કર્યો હતો. આ જીત એટલે પણ ખાસ છે કારણ કે તેણે ઓલિમ્પિયન અર્જુન બાબુતાને મ્હાત આપી હતી, જે ૨૫૧.૪ ના સ્કોર સાથે સિલ્વર મેડલ પર અટક્યા હતા. આ હરીફાઈમાં ઐશ્વર્ય પ્રતાપ સિંહ તોમરે બ્રોન્ઝ મેડલ જીત્યો હતો.
ગુજરાતની પ્રતિભાનો ડંકો: મોહમ્મદ મુર્તઝા ગોલ્ડન બોય બન્યો
ગુજરાત માટે ગૌરવની વાત એ છે કે જૂનિયર કેટેગરીમાં રાજ્યના શૂટર મોહમ્મદ મુર્તઝા વાણિયાએ અદભૂત પ્રદર્શન કર્યું છે. ૧૦ મીટર એર રાઈફલ મેન્સ જૂનિયર ફાઈનલમાં મુર્તઝાએ ૨૫૪.૩ ના જબરદસ્ત સ્કોર સાથે ગોલ્ડ મેડલ જીતીને સાબિત કરી દીધું કે ગુજરાતમાં નિશાનેબાજીની પ્રતિભા ઓછી નથી. આ કેટેગરીમાં પશ્ચિમ બંગાળના અભિનવ શોએ સિલ્વર અને કર્ણાટકના ઓંકાર વાઘમારે બ્રોન્ઝ મેડલ મેળવ્યો હતો.
યુથ કેટેગરીમાં ઓંકારનું વર્ચસ્વ
૧૦ મીટર એર રાઈફલ મેન્સ યુથ ફાઈનલમાં કર્ણાટકના ઓંકાર વિકાસ વાઘમારેએ જૂનિયર ફાઈનલની કસર અહીં પૂરી કરી હતી. તેણે ૨૫૦ ના સ્કોર સાથે ગોલ્ડ મેડલ પર કબજો કર્યો હતો. ઓંકારે ફાઈનલના છેલ્લા શોટમાં જે હિંમત બતાવી તેણે તેને તેના જ સાથી ખેલાડી નરેન પ્રણવ કરતા માત્ર ૦.૩ પોઈન્ટથી આગળ કરી દીધો હતો. નરેનને સિલ્વર અને તમિલનાડુના શક્તિવેલ સેન્થિવેલને બ્રોન્ઝ મેડલથી સંતોષ માનવો પડ્યો હતો.
નેશનલ શૂટિંગ ચેમ્પિયનશિપના આ પરિણામો દર્શાવે છે કે દેશમાં વરિષ્ઠ ખેલાડીઓની સાથે સાથે નવી પેઢીના શૂટર્સ પણ ઓલિમ્પિક સ્તરના પડકારો ઝીલવા માટે તૈયાર થઈ રહ્યા છે.