મેલબોર્ન : ક્રિકેટના મક્કા ગણાતા મેલબોર્ન ક્રિકેટ ગ્રાઉન્ડ (MCG) પર રમાયેલી ચોથી એશેઝ ટેસ્ટમાં એક એવો અનોખો રેકોર્ડ બન્યો છે જે ઓસ્ટ્રેલિયાના ટેસ્ટ ઇતિહાસમાં અગાઉ ક્યારેય જોવા મળ્યો નથી. 142 ઓવરની રમત અને 36 વિકેટોના પતન છતાં, આખી મેચમાં એક પણ ઓવર સ્પિનર દ્વારા ફેંકવામાં આવી નથી! પેસ બોલરોએ મેલબોર્નની પિચ પર એવો કહેર મચાવ્યો કે બે દિવસમાં જ મેચનો ફેંસલો આવી ગયો.
સ્પિનરોનો 'દુકાળ' અને પેસર્સનું રાજ
ઓસ્ટ્રેલિયન ધરતી પર ટેસ્ટ ક્રિકેટના ઇતિહાસમાં આ પ્રથમ એવી મેચ છે જે સ્પિનરની એક પણ ઓવર વગર પૂર્ણ થઈ હોય. મેચમાં કુલ 9 બોલરોએ બોલિંગ કરી, પરંતુ તમામ ફાસ્ટ બોલરો હતા. ઇંગ્લેન્ડ તરફથી ગસ એટકિન્સન, બ્રાયડન કાર્સ, જોશ ટોંગ અને બેન સ્ટોક્સે મોરચો સંભાળ્યો હતો, જ્યારે ઓસ્ટ્રેલિયા તરફથી કેમેરોન ગ્રીન, મિચેલ સ્ટાર્ક, માઈકલ નેસર, ઝાઈ રિચાર્ડસન અને સ્કોટ બોલેન્ડે બોલિંગ કરી હતી. તમામ 36 વિકેટ ઝડપી બોલરોના ખાતે ગઈ હતી.
બેટર્સ માટે 'કાળ' સાબિત થઈ પિચ
આ મેચમાં બોલરોનું વર્ચસ્વ એટલું હતું કે બંને ટીમના 22 ખેલાડીઓમાંથી એક પણ બેટ્સમેન અડધી સદી (50 રન) ફટકારી શક્યો નથી. ઇંગ્લેન્ડના જોશ ટોંગે પ્રથમ ઇનિંગમાં 5 વિકેટ ઝડપી મેચમાં કુલ 7 વિકેટ મેળવી 'પ્લેયર ઓફ ધ મેચ'નો એવોર્ડ જીત્યો હતો. ઓસ્ટ્રેલિયાની ટીમ બીજી ઇનિંગમાં માત્ર 132 રનમાં ઓલઆઉટ થઈ ગઈ હતી, જેના કારણે ઇંગ્લેન્ડને જીતવા માટે 175 રનનો ટાર્ગેટ મળ્યો હતો જે તેમણે 6 વિકેટ ગુમાવીને હાંસલ કરી લીધો હતો.
એશેઝના ઇતિહાસની ચોથી સૌથી ટૂંકી મેચ
સમયની દ્રષ્ટિએ આ મેચ એશેઝ ઇતિહાસની ચોથી સૌથી ટૂંકી મેચ સાબિત થઈ છે. આ મેચમાં માત્ર 852 બોલ ફેંકાયા હતા. આ અગાઉ 1888માં ઓલ્ડ ટ્રેફોર્ડ ખાતે માત્ર 788 બોલમાં મેચ પૂરી થઈ હતી. રસપ્રદ વાત એ છે કે આ જ એશેઝ સિરીઝની પર્થ ટેસ્ટ પણ માત્ર 847 બોલમાં પૂરી થઈ હતી.
ઇંગ્લેન્ડ માટે 'સન્માન'ની જીત
જોકે ઓસ્ટ્રેલિયા શરૂઆતની ત્રણેય મેચ જીતીને એશેઝ ટ્રોફી પોતાની પાસે જાળવી રાખવામાં સફળ રહ્યું છે, પરંતુ ઇંગ્લેન્ડે મેલબોર્નમાં 15 વર્ષ પછી ટેસ્ટ જીતીને પોતાનું સન્માન બચાવ્યું છે. 92,000 થી વધુ દર્શકોની હાજરીમાં રમાયેલી આ મેચ તેની ઝડપ અને અનોખા રેકોર્ડ માટે વર્ષો સુધી યાદ રાખવામાં આવશે.