નવી દિલ્હી: ભારતીય ક્રિકેટ કંટ્રોલ બોર્ડ (BCCI) ની જુનિયર પસંદગી સમિતિએ આગામી વર્ષે રમાનારા ICC અંડર-19 વર્લ્ડ કપ અને તે પહેલાંના દક્ષિણ આફ્રિકા પ્રવાસ માટે ભારતીય ટીમની જાહેરાત કરી દીધી છે. આ જાહેરાતમાં સૌથી વધુ આકર્ષણનું કેન્દ્ર બિહારના ૧૩ વર્ષીય પ્રતિભાશાળી ખેલાડી વૈભવ સૂર્યવંશી રહ્યા છે, જેમને દક્ષિણ આફ્રિકા સામેની વનડે શ્રેણી માટે કેપ્ટન બનાવવામાં આવ્યા છે.
બે અલગ શ્રેણી, બે અલગ કેપ્ટન
ભારતીય ટીમ વર્લ્ડ કપ પહેલા ૩ જાન્યુઆરીથી દક્ષિણ આફ્રિકા સામે ત્રણ મેચની વનડે શ્રેણી રમશે. આ શ્રેણી માટે વૈભવ સૂર્યવંશીને સુકાની પદ સોંપાયું છે અને એરોન જ્યોર્જ વાઈસ-કેપ્ટન રહેશે. જોકે, મુખ્ય ટુર્નામેન્ટ એટલે કે અંડર-19 વર્લ્ડ કપ માટે આયુષ મ્હાત્રે ટીમનું નેતૃત્વ કરશે અને વિહાન મલ્હોત્રા ઉપ-કેપ્ટન તરીકેની જવાબદારી નિભાવશે.
ઇજાનો પડકાર અને તૈયારીઓ
વર્લ્ડ કપના કેપ્ટન આયુષ મ્હાત્રે અને વાઈસ-કેપ્ટન વિહાન મલ્હોત્રા હાલમાં કાંડાની ઇજા સામે ઝઝૂમી રહ્યા છે. સાવચેતીના ભાગરૂપે તેમને દક્ષિણ આફ્રિકા પ્રવાસમાં આરામ આપીને બેંગલુરુમાં 'BCCI સેન્ટર ઓફ એક્સેલન્સ' ખાતે દેખરેખ હેઠળ રાખવામાં આવ્યા છે. પસંદગીકારોને આશા છે કે ૧૫ જાન્યુઆરીથી શરૂ થતા વર્લ્ડ કપ સુધીમાં બંને સંપૂર્ણ ફિટ થઈ જશે.
ઝિમ્બાબ્વે અને નામિબિયામાં ટાઇટલ બચાવવાનો જંગ
અંડર-19 વર્લ્ડ કપ ૨૦૨૬ ઝિમ્બાબ્વે અને નામિબિયામાં ૧૫ જાન્યુઆરીથી ૬ ફેબ્રુઆરી દરમિયાન રમાશે. ભારતીય ટીમ આ ટુર્નામેન્ટમાં ડિફેન્ડિંગ ચેમ્પિયન તરીકે ઉતરશે. ટીમમાં ગુજરાતી ખેલાડીઓ ખિલન પટેલ, હેનિલ પટેલ અને યુવરાજ ગોહિલનો સમાવેશ પણ કરવામાં આવ્યો છે, જે ગુજરાત ક્રિકેટ માટે ગર્વની વાત છે.
વર્લ્ડ કપ માટે ભારતની અંતિમ ટીમ:
આયુષ મ્હાત્રે (કેપ્ટન), વિહાન મલ્હોત્રા (વાઈસ-કેપ્ટન), વૈભવ સૂર્યવંશી, એરોન જ્યોર્જ, વેદાંત ત્રિવેદી, અભિજ્ઞાન કુંડુ (wk), હરવંશ સિંહ (wk), આર.એસ. અંબરીશ, કનિષ્ક ચૌહાણ, ખિલન એ. પટેલ, મોહમ્મદ ઇનાન, હેનીલ પટેલ, ડી. દિપેશ, કિશન કુમાર સિંહ, ઉદ્ધવ મોહન