ચંદીગઢ : ભારતીય ક્રિકેટના સૌથી વિવાદાસ્પદ અને બેબાક વ્યક્તિત્વ ગણાતા યોગરાજ સિંહે ફરી એકવાર મોટો ધડાકો કર્યો છે. આ વખતે તેમના નિશાન પર મુંબઈ ઈન્ડિયન્સ (MI) ની ટીમ છે. યોગરાજ સિંહનો દાવો છે કે અર્જુન તેંડુલકરમાં તેના પિતા સચિન તેંડુલકર જેવી જ બેટિંગ ક્ષમતા છે, પરંતુ મુંબઈ ઈન્ડિયન્સે પાંચ વર્ષ સુધી તેની આ પ્રતિભાને નજરઅંદાજ કરી અને તેને યોગ્ય તક આપી નહીં.

નેટ્સમાં બેટિંગ જોઈને યોગરાજ થયા દંગ

એક યુટ્યુબ ચેનલને આપેલા ઈન્ટરવ્યુમાં યોગરાજ સિંહે ખુલાસો કર્યો કે જ્યારે અર્જુન તેમની પાસે ટ્રેનિંગ માટે આવ્યો ત્યારે તેની બેટિંગ જોઈને તેઓ આશ્ચર્યચકિત થઈ ગયા હતા. તેમણે કહ્યું, "મેં તેને પહેલાં ક્યારેય બેટિંગ કરતા જોયો ન હતો. પણ જ્યારે તે નેટ્સમાં ઉતર્યો, ત્યારે તે ચોગ્ગા-છગ્ગાની રમઝટ બોલાવી રહ્યો હતો. તેની બેટિંગમાં સચિન જેવી જ ક્વોલિટી છે. મેં તેના કોચને પણ પૂછ્યું હતું કે તમે તેની પાસે બેટિંગ કેમ નથી કરાવતા?"

રણજી ડેબ્યૂમાં સદી અને MI ને મેસેજ

યોગરાજ સિંહે વધુમાં જણાવ્યું કે તેમની સાથે માત્ર 12 દિવસ તાલીમ લીધા બાદ અર્જુને 2022 માં રણજી ટ્રોફીના ડેબ્યૂમાં જ સદી ફટકારી હતી. તેમણે મુંબઈ ઈન્ડિયન્સના મેનેજમેન્ટને મેસેજ મોકલીને સલાહ આપી હતી કે અર્જુનને 2-3 મેચમાં ઓપનિંગ કરવાની તક આપો, પરંતુ ટીમે આ સલાહને અવગણી હતી. મુંબઈ માટે પાંચ સીઝનમાં અર્જુને માત્ર પાંચ જ મેચ રમી છે, જેમાં તેને બેટિંગ કરવાની બહુ ઓછી તક મળી.

હવે લખનૌ સુપર જાયન્ટ્સ (LSG) સાથે નવી શરૂઆત

IPL 2026 પહેલા અર્જુન તેંડુલકર હવે લખનૌ સુપર જાયન્ટ્સ (LSG) ની ટીમમાં સામેલ થઈ ગયો છે. ગોવા માટે રમેલા તાજેતરના મુકાબલામાં અર્જુન ઓપનિંગ બેટ્સમેનની ભૂમિકા ભજવી રહ્યો છે. જોકે, હજુ સુધી તેને T20 કે 50-ઓવરના ફોર્મેટમાં ઓપનર તરીકે મોટી સફળતા મળી નથી, પરંતુ યોગરાજ સિંહને વિશ્વાસ છે કે જો તેને યોગ્ય ક્રમ પર બેટિંગ આપવામાં આવે, તો તે દુનિયાને ચોંકાવી શકે છે.

પિતા-પુત્રનો અનોખો રેકોર્ડ

રસપ્રદ વાત એ છે કે સચિન તેંડુલકરે 1988 માં ગુજરાત સામે પોતાના રણજી ડેબ્યૂમાં સદી ફટકારી હતી અને અર્જુને પણ પિતાના પગલે ચાલીને રાજસ્થાન સામે ડેબ્યૂમાં સદી ફટકારી હતી. હવે જોવાનું એ રહેશે કે શું લખનૌ સુપર જાયન્ટ્સ યોગરાજ સિંહની સલાહ માનીને અર્જુનને બેટિંગમાં પ્રોત્સાહન આપે છે કે નહીં.

અર્જુન તેંડુલકરની અત્યાર સુધીની કરિયર:

· IPL: 5 મેચ, 3 વિકેટ, 13 રન.

· રણજી ટ્રોફી: ડેબ્યૂ મેચમાં સદી.

· વર્તમાન ટીમ: લખનૌ સુપર જાયન્ટ્સ (LSG).

· યોગરાજ સિંહની ટિપ્પણી: "તે હીરો છે, પણ તેને ઓળખવામાં ભૂલ થઈ છે."