રાજકોટ : નવું વર્ષ ૨૦૨૬ ભારતીય ક્રિકેટ ચાહકો માટે રોમાંચક રહેવાનું છે. ૧૧ જાન્યુઆરીથી ન્યુઝીલેન્ડ સામે શરૂ થઈ રહેલી ૩ મેચોની વનડે શ્રેણી માટે ભારતીય ટીમની હજુ સત્તાવાર જાહેરાત થઈ નથી, પરંતુ તે પહેલા જાણીતા કોમેન્ટેટર અને ભૂતપૂર્વ ખેલાડી આકાશ ચોપરાએ પોતાની ૧૫ સભ્યોની સંભવિત ટીમ જાહેર કરીને સોશિયલ મીડિયા પર ચર્ચા જગાડી છે. આકાશ ચોપરાએ આ શ્રેણી માટે શુભમન ગિલને કેપ્ટન તરીકે પસંદ કર્યો છે.
 આકાશ ચોપરાની ટીમમાં સૌથી મોટો ફેરફાર બોલિંગ વિભાગમાં જોવા મળ્યો છે. વર્કલોડ મેનેજમેન્ટને ધ્યાનમાં રાખીને તેમણે જસપ્રીત બુમરાહ અને સ્ટાર ઓલરાઉન્ડર હાર્દિક પંડ્યાને આરામ આપવાની તરફેણ કરી છે. બીજી તરફ, લાંબા સમયથી વનડે ફોર્મેટથી દૂર રહેલા મોહમ્મદ સિરાજને તેમણે મુખ્ય બોલર તરીકે ટીમમાં સ્થાન આપ્યું છે. મધ્યમ ક્રમમાં કેએલ રાહુલ અને ઋષભ પંત બંનેને સામેલ કરવામાં આવ્યા છે.
 આકાશ ચોપરાએ પોતાની ટીમમાં હર્ષિત રાણા અને પ્રસિદ્ધ કૃષ્ણ જેવા ઝડપી બોલરો પર વિશ્વાસ વ્યક્ત કર્યો છે. સ્પિન વિભાગમાં કુલદીપ યાદવની સાથે વોશિંગ્ટન સુંદર અને રવીન્દ્ર જાડેજા અથવા અક્ષર પટેલમાંથી કોઈ એકને તક આપવાની વાત કરી છે. જોકે, આશ્ચર્યજનક રીતે તેમણે નીતીશ કુમાર રેડ્ડી અને ધ્રુવ જુરેલને પોતાની લિસ્ટમાંથી બાકાત રાખ્યા છે.
આ શ્રેણીની પ્રથમ મેચ ૧૧ જાન્યુઆરીએ વડોદરામાં રમાશે, જે બાદ બીજી મેચ ૧૪ જાન્યુઆરીએ રાજકોટના ખંઢેરી સ્ટેડિયમ ખાતે રમાશે. ગુજરાતના ક્રિકેટ પ્રેમીઓ માટે આ શ્રેણી ખૂબ જ ખાસ રહેવાની છે. અંતિમ વનડે ૧૮ જાન્યુઆરીએ ઈન્દોરમાં રમાશે.

આકાશ ચોપરાની સંભવિત ટીમ ઈન્ડિયા: રોહિત શર્મા, શુભમન ગિલ (કેપ્ટન), વિરાટ કોહલી, રુતુરાજ ગાયકવાડ, કેએલ રાહુલ, તિલક વર્મા, રવીન્દ્ર જાડેજા/અક્ષર પટેલ, વોશિંગ્ટન સુંદર, કુલદીપ યાદવ, હર્ષિત રાણા, મોહમ્મદ સિરાજ, અર્શદીપ સિંહ, પ્રસિદ્ધ કૃષ્ણ, ઋષભ પંત (WK), યશસ્વી જયસ્વાલ.
વનડે શ્રેણીનું શેડ્યૂલ:
• પહેલી વનડે: ૧૧ જાન્યુઆરી, વડોદરા
• બીજી વનડે: ૧૪ જાન્યુઆરી, રાજકોટ
• ત્રીજી વનડે: ૧૮ જાન્યુઆરી, ઈન્દોર