મેલબોર્ન: ટેનિસ જગતમાંથી એક રોમાંચક સમાચાર સામે આવ્યા છે. સાત વખતની ગ્રાન્ડ સ્લેમ ચેમ્પિયન અને ટેનિસ વિશ્વની દિગ્ગજ ખેલાડી વિનસ વિલિયમ્સ ફરી એકવાર ગ્રાન્ડ સ્લેમના મેદાનમાં ઉતરવા જઈ રહી છે. ઓસ્ટ્રેલિયન ઓપન આયોજકોએ સત્તાવાર રીતે પુષ્ટિ કરી છે કે ૪૫ વર્ષીય અમેરિકન સુપરસ્ટારને વર્ષ ૨૦૨૬ની પ્રથમ ગ્રાન્ડ સ્લેમ ટૂર્નામેન્ટ માટે વાઈલ્ડ કાર્ડ એન્ટ્રી આપવામાં આવી છે.
વિનસ વિલિયમ્સ, જેણે બે દાયકાથી વધુ સમય સુધી ટેનિસ કોર્ટ પર રાજ કર્યું છે, તેનું આ ઉંમરે પુનરાગમન એ રમતગમતના ઇતિહાસમાં જવલ્લે જ જોવા મળતી ઘટના છે. સોશિયલ મીડિયા પર ચાહકો આને 'ક્વીન વી'નું શાહી પુનરાગમન ગણાવી રહ્યા છે. જોકે, વિવેચકોનું માનવું છે કે આધુનિક ટેનિસની ઝડપ અને યુવા ખેલાડીઓના જોશ સામે ૪૫ વર્ષની ઉંમરે ટકી રહેવું વિનસ માટે મોટો પડકાર બની રહેશે, પરંતુ તેનો અનુભવ અને લડાયક મિજાજ મેલબોર્ન પાર્કમાં ફરી એકવાર ઇતિહાસ સર્જી શકે છે.
વાઇલ્ડ કાર્ડ એન્ટ્રી શું છે ?
ટેનિસની રમતમાં સામાન્ય રીતે કોઈપણ ગ્રાન્ડ સ્લેમ જેવી મોટી ટુર્નામેન્ટમાં ભાગ લેવા માટે બે મુખ્ય રસ્તા હોય છે. પ્રથમ રસ્તો ખેલાડીના વિશ્વ રેન્કિંગ પર આધારિત છે, એટલે કે જો ખેલાડીનું રેન્કિંગ ઊંચું હોય તો તેને સીધો પ્રવેશ મળે છે. બીજો રસ્તો 'ક્વોલિફાઈંગ રાઉન્ડ' છે, જેમાં નીચું રેન્કિંગ ધરાવતા ખેલાડીઓએ અન્ય ખેલાડીઓ સામે જીતીને મુખ્ય ટુર્નામેન્ટમાં સ્થાન બનાવવું પડે છે. પરંતુ 'વાઈલ્ડ કાર્ડ એન્ટ્રી' એ આ બંને નિયમોથી અલગ એક વિશેષ વ્યવસ્થા છે.
વાઈલ્ડ કાર્ડ એ ટુર્નામેન્ટના આયોજકો પાસે રહેલો એક વિશેષાધિકાર છે. આ અંતર્ગત આયોજકો એવા કોઈ ખેલાડીને સીધો જ મુખ્ય ટુર્નામેન્ટમાં પ્રવેશ આપે છે, જેનું રેન્કિંગ પ્રવેશ માટે લાયક ન હોય અથવા જેણે ક્વોલિફાઈંગ મેચો રમી ન હોય. સરળ ભાષામાં કહીએ તો, આ એક પ્રકારનું 'સ્પેશિયલ આમંત્રણ' છે.
આયોજકો સામાન્ય રીતે ત્રણ કારણોસર વાઈલ્ડ કાર્ડ આપે છે: યજમાન દેશના સ્થાનિક ખેલાડીઓને પ્રોત્સાહન આપવા, અત્યંત પ્રતિભાશાળી યુવા ખેલાડીઓને તક આપવા, અથવા ભૂતકાળના લોકપ્રિય ચેમ્પિયન ખેલાડીઓને સન્માન આપવા માટે.
વિનસ વિલિયમ્સના કિસ્સામાં ત્રીજું કારણ લાગુ પડે છે. તેઓ ૪૫ વર્ષના છે અને છેલ્લા ઘણા સમયથી ઈજાઓ અને ઓછી મેચો રમવાને કારણે તેમનું વિશ્વ રેન્કિંગ ઘણું પાછળ ગયું છે. નિયમ મુજબ તેઓ ઓસ્ટ્રેલિયન ઓપનમાં સીધા રમી શકે નહીં. પરંતુ તેઓ ભૂતકાળમાં સાત ગ્રાન્ડ સ્લેમ જીતી ચૂક્યા છે અને ટેનિસ જગતના સુપરસ્ટાર છે. તેમના રમવાથી સ્ટેડિયમમાં પ્રેક્ષકોની ભીડ જામે છે અને ટુર્નામેન્ટનું આકર્ષણ વધે છે. તેથી, તેમના ભૂતકાળના પ્રદાન અને લોકપ્રિયતાને ધ્યાનમાં રાખીને, ઓસ્ટ્રેલિયન ઓપન કમિટીએ તેમને રેન્કિંગના નિયમો બાજુ પર મૂકીને સીધો પ્રવેશ આપ્યો છે, જેને વાઈલ્ડ કાર્ડ એન્ટ્રી કહેવાય છે.