કુઆલાલમ્પુર:મલેશિયા ઓપન 2026ની પ્રતિષ્ઠિત બેડમિન્ટન ટુર્નામેન્ટમાં ભારતના રમતપ્રેમીઓ માટે માઠા સમાચાર સામે આવ્યા છે. ભારતની સ્ટાર શટલર અને બે વખતની ઓલિમ્પિક મેડલિસ્ટ પી. વી. સિંધુની હાર સાથે આ ટુર્નામેન્ટમાં ભારતીય અભિયાનનો સત્તાવાર અંત થયો છે. ગઈ કાલે રમાયેલી હાઈ-વોલ્ટેજ સેમી-ફાઇનલ મેચમાં ચીનની દિગ્ગજ ખેલાડી અને વર્લ્ડ નંબર-2 વાંગ ઝિયી સામે સિંધુનો સંઘર્ષ ટૂંકો પડ્યો હતો. જોકે, હાર છતાં સિંધુએ જે રીતે કોર્ટ પર વાપસી કરી છે, તેણે ચાહકોના દિલ જીતી લીધા છે.

મેચની શરૂઆતથી જ વર્લ્ડ નંબર-2 વાંગ ઝિયીએ આક્રમક વલણ અપનાવ્યું હતું. પ્રથમ સેટમાં સિંધુએ કેટલાક શાનદાર સ્મેશ અને ડ્રોપ શોટ્સ દ્વારા ટક્કર આપવાનો પ્રયાસ કર્યો હતો, પરંતુ ચીની ખેલાડીએ પોતાની ચપળતાના જોરે પ્રથમ ગેમ ૨૧-૧૬થી જીતી લીધી હતી. બીજી ગેમમાં પણ સિંધુએ કમબેક કરવાના મરણીયા પ્રયાસો કર્યા, પરંતુ વાંગ ઝિયીના સચોટ નેટ પ્લે સામે તે લાચાર જણાઈ હતી. અંતે બીજી ગેમ પણ ૨૧-૧૫થી ગુમાવતા સિંધુનું ફાઇનલમાં પહોંચવાનું સપનું અધૂરું રહી ગયું હતું.

નોંધનીય છે કે પી. વી. સિંધુ લાંબા સમય સુધી ઈજાના કારણે કોર્ટથી દૂર રહી હતી. વર્લ્ડ રેન્કિંગમાં ૧૮મા ક્રમે સરકી ગયેલી સિંધુ માટે આ ટુર્નામેન્ટ આત્મવિશ્વાસ વધારનારી સાબિત થઈ છે. છેલ્લા ૧૩ મહિનામાં આ પ્રથમ વખત હતું જ્યારે સિંધુ કોઈ મોટી ટુર્નામેન્ટની સેમી-ફાઇનલ સુધી પહોંચવામાં સફળ રહી હતી. ઇન્જરી બાદની આ સફર દર્શાવે છે કે તે ફરીથી પોતાના જૂના ફોર્મમાં પરત ફરી રહી છે અને આગામી આંતરરાષ્ટ્રીય સ્પર્ધાઓ માટે ભારતની આશા જીવંત રાખી છે.

ટુર્નામેન્ટમાંથી બહાર થયા બાદ ખેલ જગતના માંધાતાઓ સિંધુના પ્રદર્શનના વખાણ કરી રહ્યા છે. સેમી-ફાઇનલમાં પહોંચવું એ સાબિત કરે છે કે તેની ફિટનેસ હવે યોગ્ય સ્તરે પહોંચી ગઈ છે. ભારતીય બેડમિન્ટન ચાહકો હવે સિંધુની આગામી ટુર્નામેન્ટ્સ પર નજર ટેકવીને બેઠા છે, જ્યાં તે ફરીથી સુવર્ણ સફળતા મેળવી શકે. મલેશિયા ઓપન ભલે તેના માટે ટાઈટલ જીત્યા વગર સમાપ્ત થઈ હોય, પરંતુ તેની આ વાપસી ભારતીય સ્પોર્ટ્સ માટે ૨૦૨૬ના વર્ષની મોટી સિદ્ધિ ગણવામાં આવી રહી છે.