મુંબઈ: પેરિસ ઓલિમ્પિક્સ ૨૦૨૪માં માત્ર ૨૧ વર્ષની ઉંમરે બ્રોન્ઝ મેડલ જીતીને ઇતિહાસ રચનાર અમન સેહરાવત અત્યારે ભારતીય રમતજગતનું સૌથી તેજસ્વી નામ છે. વ્યક્તિગત ઓલિમ્પિક મેડલ જીતનાર સૌથી યુવા ભારતીય બન્યા બાદ, અમન હવે તેના આગામી મોટા લક્ષ્ય – ૨૦૨૮ લોસ એન્જલસ ઓલિમ્પિક્સમાં ગોલ્ડ મેડલ જીતવા માટે અત્યારથી જ પરસેવો પાડી રહ્યો છે.
સસ્પેન્શનનો કડવો અનુભવ અને તેમાંથી મળેલો પાઠ
તાજેતરમાં વર્લ્ડ ચેમ્પિયનશિપ દરમિયાન વજન વધી જવાને કારણે સસ્પેન્શનનો સામનો કરનાર અમન માટે આ સમય ભાવનાત્મક ઉતાર-ચઢાવ જેવો રહ્યો હતો. તેણે સ્વીકાર્યું કે, "જે થયું તે ભૂલ હતી, પરંતુ તેમાંથી મને ઘણું શીખવા મળ્યું છે. હવે હું નિયમો પ્રત્યે વધુ સતર્ક અને જાગૃત થયો છું. તે એપિસોડે મને માનસિક રીતે વધુ મજબૂત બનાવ્યો છે." વજનના મુદ્દે તેણે ઉમેર્યું કે, કેટલીકવાર સ્વાસ્થ્યના પ્રશ્નોને કારણે સ્થિતિ હાથમાં રહેતી નથી, પરંતુ હવે હું ખાતરી કરીશ કે આવી ઘટના ફરી ન બને.
મુંબઈની ટીમ માટે મેદાને જંગ
અમન ૧૫ જાન્યુઆરીથી નોઈડામાં શરૂ થઈ રહેલી પ્રો રેસલિંગ લીગ (PWL) માં ‘ટાઈગર્સ ઓફ મુંબઈ દંગલ’ ટીમનું પ્રતિનિધિત્વ કરી રહ્યો છે. ૧૮ લાખ રૂપિયાની હરાજી કિંમત સાથે તે ટીમનો મુખ્ય ચહેરો છે. અમન કહે છે કે, "ટીમનું વાતાવરણ ખૂબ જ હળવું અને પ્રોત્સાહક છે, જેના કારણે હું કોઈપણ દબાણ વગર મારું ૧૦૦ ટકા આપી શકીશ. અમારું લક્ષ્ય આ વખતે લીગ ટાઇટલ જીતવાનું છે."
લક્ષ્ય હવે માત્ર પીળી ધાતુ (ગોલ્ડ)
જ્યારે તેને ૨૦૨૮ના ઓલિમ્પિક્સ વિશે પૂછવામાં આવ્યું, ત્યારે અમનની આંખોમાં એક અલગ જ ચમક હતી. તેણે સ્પષ્ટ કર્યું કે, "હવે મારો ટાર્ગેટ માત્ર મેડલ નથી, પણ ગોલ્ડ મેડલ છે. હું માત્ર સહભાગી થવા માટે નહીં પણ ભારતને ઓલિમ્પિકમાં કુસ્તીનો સુવર્ણ ચંદ્રક અપાવવા માટે તાલીમ લઈ રહ્યો છું." તાજેતરમાં નેશનલ ચેમ્પિયનશિપમાં ગોલ્ડ જીતીને તેણે પોતાના ફોર્મનો પુરાવો આપી દીધો છે.
અમન સેહરાવતનું માનવું છે કે પ્રો રેસલિંગ લીગ જેવી ટુર્નામેન્ટ્સથી ભારતીય કુસ્તીને લાંબા ગાળે ઘણો ફાયદો થશે અને નવા ખેલાડીઓને આંતરરાષ્ટ્રીય સ્તરનું એક્સપોઝર મળશે.