મુંબઈ: ટીમ ઈન્ડિયાના સ્ટાર બેટ્સમેન વિરાટ કોહલીના ચાહકો માટે મોટા સમાચાર સામે આવ્યા છે. આઈસીસી (ICC) દ્વારા જાહેર કરવામાં આવેલા તાજેતરના વન-ડે રેન્કિંગમાં વિરાટ કોહલીએ પોતાનું નંબર વનનું સ્થાન ગુમાવ્યું છે. ન્યુઝીલેન્ડના ડેરિલ મિશેલે તાજેતરની શ્રેણીમાં શાનદાર પ્રદર્શન કરીને કોહલીને પાછળ છોડી દીધો છે અને રેન્કિંગમાં ટોચનું સ્થાન કબજે કર્યું છે. ન્યુઝીલેન્ડ અને ભારત વચ્ચે રમાયેલી વન-ડે શ્રેણીમાં કિવી ટીમે ૨-૧થી વિજય મેળવતા મિશેલને આ મોટી ઉપલબ્ધિ હાંસલ કરવામાં મદદ મળી છે.
ગયા અઠવાડિયે ડેરિલ મિશેલ માત્ર એક પોઈન્ટના તફાવત સાથે બીજા સ્થાને હતો, પરંતુ હવે તેણે વિરાટ કોહલી પર નોંધપાત્ર લીડ મેળવી લીધી છે. મિશેલ હાલમાં ૮૪૫ રેટિંગ પોઈન્ટ્સ સાથે પ્રથમ સ્થાને છે, જે તેની કારકિર્દીનું સર્વોચ્ચ રેટિંગ છે.
ICC ODI રેન્કિંગમાં ટોચના 5 બેટ્સમેન:
ક્રમ ખેલાડીનું નામ રેટિંગ પોઈન્ટ્સ
૧ ડેરિલ મિશેલ (NZ) ૮૪૫
૨ વિરાટ કોહલી (IND) ૭૯૫
૩ ઇબ્રાહિમ ઝદરાન (AFG) ૭૬૪
૪ રોહિત શર્મા (IND) ૭૫૭
૫ શુભમન ગિલ (IND) ૭૨૩
 રેન્કિંગ ગુમાવ્યા બાદ હવે વિરાટ કોહલીનો વધુ એક મોટો રેકોર્ડ જોખમમાં છે. ભારતનો વિસ્ફોટક ઓપનર અભિષેક શર્મા આજે નાગપુરમાં ન્યુઝીલેન્ડ સામેની પ્રથમ T20 મેચમાં મેદાન પર ઉતરશે. વિરાટ કોહલીએ T20 ક્રિકેટમાં ૧૬૭ ઇનિંગ્સમાં ૫૦૦૦ રન પૂરા કર્યા હતા. અભિષેક શર્મા પાસે હવે આ રેકોર્ડ તોડવાની સુવર્ણ તક છે.
અભિષેકે અત્યાર સુધી ૧૬૪ ઇનિંગ્સમાં ૪૯૧૮ રન બનાવ્યા છે. જો તે આજની મેચમાં ૮૨ રન ફટકારે છે, તો તે કોહલી કરતા ઓછી ઇનિંગ્સમાં ૫૦૦૦ રન પૂરા કરનાર બેટ્સમેન બની જશે અને ભારત માટે આ સિદ્ધિ મેળવનાર ત્રીજો સૌથી ઝડપી ખેલાડી બનશે.
નાગપુરના મેદાન પર આજે રમાનારી T20 મેચ માત્ર જીત-હાર માટે જ નહીં, પણ વ્યક્તિગત રેકોર્ડ્સ માટે પણ યાદગાર બની શકે છે. શું અભિષેક શર્મા ‘કિંગ કોહલી’ના કીર્તિમાનને હંફાવવામાં સફળ રહેશે? તે જોવું રસપ્રદ રહેશે.