સિડની: પાકિસ્તાની ક્રિકેટના પોસ્ટર બોય બાબર આઝમ માટે ઓસ્ટ્રેલિયાની ધરતી પર રમાઈ રહેલી બિગ બેશ લીગ (BBL) ૨૦૨૫-૨૬ ની સીઝન કોઈ દુઃસ્વપ્નથી ઓછી રહી નથી. ટુર્નામેન્ટ જ્યારે નિર્ણાયક તબક્કે પહોંચી છે, ત્યારે બાબર આઝમ અધવચ્ચે જ સિડની સિક્સર્સનો સાથ છોડીને પાકિસ્તાન રવાના થઈ ગયા છે. સિક્સર્સની ટીમે સત્તાવાર રીતે પુષ્ટિ કરી છે કે બાબર હવે પ્લેઓફ મેચોમાં રમશે નહીં.

વિવાદોની વણઝાર અને સ્ટીવ સ્મિથ સાથે અણબનાવ

બાબરની વિદાય માત્ર ખરાબ ફોર્મને કારણે નથી, પણ મેદાન પરના વિવાદોએ પણ મોટો ભાગ ભજવ્યો છે. સિડની થંડર સામેની મેચમાં જ્યારે સ્ટીવ સ્મિથ ૪૭ રને રમી રહ્યો હતો, ત્યારે તેણે બાબરને સિંગલ આપવાનો ઇનકાર કર્યો હતો. આ ઘટનાથી બાબર એટલા નારાજ થયા કે મેચ બાદ તેમણે વિરોધી ટીમ સાથે પરંપરાગત હાથ મિલાવવામાં પણ ભાગ લીધો ન હતો. કેપ્ટન મોઇસેસ હેનરિકેસે ખુલાસો કર્યો હતો કે બાબરને શાંત પાડવા માટે કોચ અને મેનેજમેન્ટે ઘણી મહેનત કરવી પડી હતી.

ધીમી બેટિંગ બની મુસીબત

ટી૨૦ ક્રિકેટના આ યુગમાં બાબર આઝમનો સ્ટ્રાઈક રેટ હંમેશા ચર્ચાનો વિષય રહ્યો છે. BBL ની ૧૧ ઇનિંગ્સમાં તેમણે માત્ર ૧૦૩.૦૬ ના સ્ટ્રાઈક રેટથી ૨૦૨ રન બનાવ્યા. ઓસ્ટ્રેલિયાના દિગ્ગજ ખેલાડી માર્ક વોએ તો ત્યાં સુધી કહી દીધું હતું કે, "બાબર ભલે વર્લ્ડ ક્લાસ પ્લેયર હોય, પણ હાલમાં તે ટીમ પર બોજ બની રહ્યો છે. સિક્સર્સે તેને પડતો મૂકીને ડેનિયલ હ્યુજીસ જેવા આક્રમક ખેલાડીને લેવો જોઈએ."

રાષ્ટ્રીય ફરજ કે પરાણે વિદાય?

સત્તાવાર રીતે એવું કહેવામાં આવ્યું છે કે ૨૯ જાન્યુઆરીથી ઓસ્ટ્રેલિયા સામે શરૂ થઈ રહેલી ટી૨૦ શ્રેણી માટે બાબરને પાકિસ્તાન નેશનલ કેમ્પમાં બોલાવવામાં આવ્યા છે. જોકે, આશ્ચર્યની વાત એ છે કે અન્ય આંતરરાષ્ટ્રીય ખેલાડીઓ જેમ કે ફિન એલન અને ઓસ્ટ્રેલિયાના પોતાના સ્ટાર્સ BBL ની ફાઈનલ પૂરી કરીને જ રાષ્ટ્રીય ટીમમાં જોડાવાના છે. એવામાં બાબરનું વહેલા પરત ફરવું અનેક સવાલો ઉભા કરી રહ્યું છે.

બાબર આઝમે જતા-જતા ચાહકોનો આભાર માન્યો છે, પરંતુ ૧ અને ૦ ના સ્કોર સાથે પૂરી થયેલી તેમની આ સીઝન પાકિસ્તાની ક્રિકેટ ચાહકો માટે ચિંતાનો વિષય બની છે.