દુબઈ:  ક્રિકેટની દુનિયામાં ‘જાયન્ટ કિલર’ તરીકે ઓળખાતી અફઘાનિસ્તાનની ટીમે ફરી એકવાર સાબિત કરી દીધું છે કે તેઓ હવે કોઈ પણ મોટી ટીમને હરાવવાની ક્ષમતા ધરાવે છે. દુબઈમાં રમાયેલી બીજી ટી૨૦ મેચમાં અફઘાનિસ્તાને વેસ્ટ ઈન્ડિઝને ૩૯ રને પછાડીને ત્રણ મેચની શ્રેણીમાં ૨-૦ ની અજેય સરસાઈ મેળવી લીધી છે. આ જીતના અસલી હીરો સ્પિનર મુજીબ ઉર રહેમાન રહ્યા, જેમણે હેટ્રિક લઈને કેરેબિયન બેટિંગ લાઇનઅપની કમર તોડી નાખી હતી.

મુજીબની કરામત અને હેટ્રિકની ક્ષણ

મેચમાં જ્યારે વેસ્ટ ઈન્ડિઝ લક્ષ્યનો પીછો કરી રહ્યું હતું, ત્યારે ૨૪ વર્ષીય મુજીબે પોતાની ફિરકીનો જાદુ વિખેર્યો હતો. તેણે આઠમી ઓવરના છેલ્લા બે બોલ પર એવિન લુઈસ અને જોહ્ન્સન ચાર્લ્સને આઉટ કર્યા અને ત્યારબાદ પોતાની આગામી ઓવરના (૧૫મી ઓવર) પ્રથમ બોલ પર સેટ બેટ્સમેન બ્રાન્ડન કિંગને પેવેલિયન ભેગો કરીને પોતાની હેટ્રિક પૂરી કરી હતી. આ સાથે જ તે રશીદ ખાન અને કરીમ જનાત બાદ ટી૨૦માં હેટ્રિક લેનાર ત્રીજો અફઘાન ખેલાડી બની ગયો છે.

બેટિંગમાં સિદીકુલ્લાહ અને દરવેશનો દબદબો

અગાઉ બેટિંગ કરતા અફઘાનિસ્તાનની શરૂઆત નબળી રહી હતી, પરંતુ સિદીકુલ્લાહ અટલ (૫૩ રન) અને દરવેશ રસૂલી (૬૮ રન) એ ત્રીજી વિકેટ માટે ૧૧૫ રનની વિસ્ફોટક ભાગીદારી કરી હતી. આ બંનેની આક્રમક બેટિંગને કારણે અફઘાનિસ્તાને ૨૦ ઓવરમાં ૧૮૯ રનનો વિશાળ સ્કોર ખડક્યો હતો. અંતિમ ઓવરોમાં અઝમતુલ્લાહ ઓમરઝાઈએ માત્ર ૧૩ બોલમાં ૨૬ રન ઝૂડી કાઢ્યા હતા.

વેસ્ટ ઈન્ડિઝની વળતી લડત નિષ્ફળ

૧૯૦ રનના ટાર્ગેટ સામે વેસ્ટ ઈન્ડિઝની ટીમ ૧૮.૫ ઓવરમાં માત્ર ૧૫૦ રનમાં ઓલઆઉટ થઈ ગઈ હતી. કેપ્ટન બ્રાન્ડન કિંગે ૫૦ રન અને શિમરોન હેટમાયરે ૧૭ બોલમાં ૪૬ રનની તોફાની ઇનિંગ રમીને જીતની આશા જગાડી હતી, પરંતુ મુજીબ અને અન્ય બોલરો સામે કોઈ લાંબુ ટકી શક્યું નહીં.

આ જીત સાથે અફઘાનિસ્તાને શ્રેણી તો જીતી જ લીધી છે, પણ સાથે જ ટી૨૦ વર્લ્ડ કપ ૨૦2૬ પહેલા બાકીની ટીમો માટે ખતરાની ઘંટડી વગાડી દીધી છે. શ્રેણીની છેલ્લી મેચ આજે સાંજે રમાશે, જેમાં અફઘાનિસ્તાન ક્લીન સ્વીપ કરવાના ઈરાદા સાથે ઉતરશે.