રાયપુર : ભારત અને ન્યૂઝીલેન્ડ વચ્ચે રમાઈ રહેલી પાંચ મેચોની T20 શ્રેણીનો બીજો મુકાબલો આજે રાયપુરના શહીદ વીર નારાયણ સિંહ આંતરરાષ્ટ્રીય ક્રિકેટ સ્ટેડિયમ ખાતે રમાશે. નાગપુરની પ્રથમ મેચમાં કિવી ટીમને પછાડ્યા બાદ હવે સૂર્યકુમાર યાદવની આગેવાની હેઠળની ભારતીય ટીમ શ્રેણીમાં 2-0ની મજબૂત લીડ મેળવવાના ઈરાદે મેદાનમાં ઉતરશે.
 
પહેલી મેચનો હીરો: અભિષેક શર્મા
શ્રેણીની પ્રથમ મેચમાં ભારતીય બેટ્સમેનોએ ન્યૂઝીલેન્ડના બોલરોની રીતસરની ધોલાઈ કરી હતી. ખાસ કરીને અભિષેક શર્માની તોફાની ઇનિંગના જોરે ભારતે ૨૩૮ રનનો વિશાળ સ્કોર ખડક્યો હતો. જવાબમાં ન્યૂઝીલેન્ડ માત્ર ૧૯૦ રન બનાવી શક્યું હતું અને ભારતે ૪૮ રનથી શાનદાર વિજય મેળવ્યો હતો. આજે ફરી એકવાર રાયપુરના મેદાન પર ચોગ્ગા-છગ્ગાની રમઝટ જોવા મળી શકે છે.
ટીમ ઇન્ડિયામાં ફેરફાર: કોણ લેશે અક્ષરની જગ્યા?
ભારતીય છાવણી માટે એક માઠા સમાચાર એ છે કે ઓલરાઉન્ડર અક્ષર પટેલ પ્રથમ મેચ દરમિયાન ઇજાગ્રસ્ત થયો હતો. આજે તેની પ્લેઇંગ ઇલેવનમાં રમવાની શક્યતા નહિવત છે. તેના સ્થાને સ્પિન બોલિંગને મજબૂત કરવા રવિ બિશ્નોઈને તક મળી શકે છે અથવા જો ટીમ વધારાના ફાસ્ટ બોલર સાથે ઉતરવા માંગતી હોય તો હર્ષિત રાણાનું ડેબ્યુ થઈ શકે છે.
સાંજે ૭:૦૦ વાગ્યાથી હાઈ-વોલ્ટેજ ડ્રામા
રાયપુરની પિચ સામાન્ય રીતે બેટ્સમેનોને મદદરૂપ થાય તેવી માનવામાં આવે છે, જેનો અર્થ છે કે આજે ફરી એકવાર હાઈ-સ્કોરિંગ મેચ જોવા મળી શકે છે. ન્યૂઝીલેન્ડની ટીમ શ્રેણીમાં વાપસી કરવા માટે એડીચોટીનું જોર લગાવશે, જ્યારે ભારતીય યુવા બ્રિગેડ પોતાની જીતનો સિલસિલો જાળવી રાખવા તૈયાર છે.
મેચ અપડેટ: રાયપુરમાં ક્રિકેટ પ્રેમીઓનો ભારે ઉત્સાહ જોવા મળી રહ્યો છે. સ્ટેડિયમ હાઉસફુલ રહેવાની શક્યતા છે. મેચનું સીધું પ્રસારણ સાંજે ૭:૦૦ વાગ્યાથી શરૂ થશે.