નવી દિલ્હી : ભારતીય બેડમિન્ટનને વિશ્વના નકશા પર નવી ઓળખ અપાવનાર સુપરસ્ટાર સાયના નેહવાલે રમતમાંથી નિવૃત્તિની જાહેરાત કરતા ખેલજગતમાં ભાવુક વાતાવરણ સર્જાયું છે. ઇજાઓ સામે લાંબી લડત આપ્યા બાદ આખરે 'શટલર ક્વીન' સાયનાએ પ્રોફેશનલ બેડમિન્ટનને અલવિદા કહી દીધું છે. આ પ્રસંગે વિરાટ કોહલી, પીવી સિંધુ અને યુવરાજ સિંહ જેવા દિગ્ગજોએ સાયનાની શાનદાર કારકિર્દીને સલામી આપી છે.
 
વિરાટ અને સિંધુની ભાવુક પોસ્ટ
ટીમ ઇન્ડિયાના રન મશીન વિરાટ કોહલીએ સાયનાને અભિનંદન આપતા લખ્યું કે, "સાયના, તમારી કારકિર્દી અદ્ભુત રહી છે. તમે વિશ્વભરમાં ભારતીય બેડમિન્ટનને જે સન્માન અપાવ્યું છે તેના પર દેશને ગર્વ છે." બીજી તરફ, મેદાન પરની હરીફ અને સાથી ખેલાડી પીવી સિંધુએ પણ સાયનાનો આભાર માનતા લખ્યું કે, "ભારતીય બેડમિન્ટનને તમે જે ઊંચાઈ પર પહોંચાડ્યું છે તે બદલ આભાર. તમારા જીવનના નવા તબક્કા માટે ઘણી શુભકામનાઓ."
કેમ લેવો પડ્યો નિવૃત્તિનો નિર્ણય?
પોતાની નિવૃત્તિ વિશે વાત કરતા સાયના નેહવાલે હૃદયસ્પર્શી ખુલાસો કર્યો હતો. તેણે જણાવ્યું કે, "એક સમયે હું દિવસના 8-9 કલાક ટ્રેનિંગ કરતી હતી, પણ હવે મારા ઘૂંટણ એક-બે કલાકમાં જ થાકી જાય છે. મને ગંભીર સંધિવા (Arthritis) છે અને કોમલાસ્થિ (Cartilage) પણ ક્ષતિગ્રસ્ત થઈ ગઈ છે. પરિવાર અને કોચ સાથે ચર્ચા કર્યા પછી મને લાગ્યું કે હવે શરીર સાથ નથી આપી રહ્યું, એટલે આ મુશ્કેલ નિર્ણય લેવો પડ્યો."
ઈતિહાસના પાના પર સાયનાનું નામ
સાયના નેહવાલનું નામ ભારતીય રમતોના ઈતિહાસમાં સુવર્ણ અક્ષરે લખાશે. ૨૦૧૨ લંડન ઓલિમ્પિકમાં બ્રોન્ઝ મેડલ જીતનારી તે પ્રથમ ભારતીય શટલર હતી. ૨૦૧૫માં તે વિશ્વની નંબર-૧ ખેલાડી બની હતી. પદ્મ ભૂષણ અને ખેલ રત્ન જેવા સર્વોચ્ચ એવોર્ડથી સન્માનિત સાયનાએ ૨૦૦૯માં ઇન્ડોનેશિયા ઓપન જીતીને સાબિત કર્યું હતું કે ભારતીયો પણ બેડમિન્ટન જગતમાં રાજ કરી શકે છે.
વિદાય: સાયના નેહવાલની વિદાય સાથે બેડમિન્ટનના એક યુગનો અંત આવ્યો છે. પરંતુ તેણે કંડારેલો માર્ગ આજે દેશની હજારો દીકરીઓ માટે પ્રેરણા બની ગયો છે.