ભારત અને ન્યૂઝીલેન્ડ વચ્ચે રમાઈ રહેલી પાંચ મેચની ટી-૨૦ શ્રેણીનો બીજો મુકાબલો રાયપુરના શહીદ વીર નારાયણ સિંહ ઇન્ટરનેશનલ ક્રિકેટ સ્ટેડિયમમાં રમાયો હતો, જેમાં ભારતીય ટીમે તોફાની બેટિંગ પ્રદર્શન કરીને મેચ જીતી લીધી હતી. આ મેચમાં ભારતીય ટીમના કેપ્ટન સૂર્યકુમાર યાદવે ટોસ જીતીને પહેલા બોલિંગ કરવાનો નિર્ણય લીધો હતો. પ્રથમ બેટિંગ કરતા ન્યૂઝીલેન્ડની ટીમે મિશેલ સેન્ટનરની આક્રમક બેટિંગની મદદથી ૨૦૮ રનનો જંગી સ્કોર ખડક્યો હતો, જેના જવાબમાં ભારતે ઈશાન કિશન અને સૂર્યકુમારની જોરદાર ભાગીદારીથી આ વિશાળ લક્ષ્યાંક હાંસલ કરી લીધો હતો.
ભારતીય ટીમની શરૂઆત ખૂબ જ ખરાબ રહી હતી. રન ચેઝ કરતી વખતે ભારતે શરૂઆતમાં જ સંજુ સેમસન અને અભિષેક શર્માની વિકેટ ગુમાવી દીધી હતી. સંજુ સેમસન માત્ર ૬ રન બનાવીને અને અભિષેક શર્મા શૂન્ય રને આઉટ થઈ ગયા હતા, જેના કારણે ટીમ મુશ્કેલીમાં મુકાઈ ગઈ હતી. જોકે, ત્યાર બાદ ઈશાન કિશન અને સૂર્યકુમાર યાદવે બાજી સંભાળી હતી. આ બંને બેટ્સમેનોએ મળીને માત્ર ૨૪ બોલમાં ૫૦ રનની ભાગીદારી નોંધાવીને મેચને ફરી ભારતીય તરફેણમાં લાવી દીધી હતી. ઈશાન કિશને આક્રમક રમત દાખવતા માત્ર ૨૧ બોલમાં પોતાની અડધી સદી પૂરી કરી હતી, જેના કારણે ભારતે ૬ ઓવરમાં ૨ વિકેટે ૭૫ રન બનાવી લીધા હતા. ઈશાન કિશન ૩૨ બોલમાં ૭૬ રન બનાવીને આઉટ થયો હતો, પરંતુ ત્યાં સુધીમાં તેણે સૂર્યકુમાર સાથે મળીને ૪૯ બોલમાં ૧૨૨ રનની નિર્ણાયક ભાગીદારી કરી લીધી હતી. બીજી તરફ સૂર્યકુમાર યાદવે પણ ઝંઝાवाती બેટિંગ કરતા ૩૭ બોલમાં ૮૨ રન ફટકાર્યા હતા અને ૪૬૮ દિવસ બાદ અડધી સદી ફટકારી હતી.
આ પહેલા ન્યૂઝીલેન્ડની ઈનિંગ્સની વાત કરીએ તો, ટિમ સીફર્ટ અને ડેવોન કોન્વેએ મળીને પ્રથમ બે ઓવરમાં જ ૪૩ રન જોડી દીધા હતા, પરંતુ ત્યાર બાદની ૮ બોલની અંદર જ પ્રવાસી ટીમે બંને સેટ ઓપનર્સ ગુમાવી દીધા હતા. જોકે, રચિન રવિન્દ્રએ ઝડપી રન બનાવવાનું ચાલુ રાખ્યું હતું અને પાવરપ્લેમાં ટીમને ૬૪ રન સુધી પહોંચાડી હતી. મધ્યમાં કુલદીપ યાદવ અને શિવમ દુબેએ ભારત તરફથી વિકેટો ઝડપી હતી. કુલદીપ યાદવ ભારત તરફથી સૌથી સફળ બોલર રહ્યો હતો અને તેણે બે વિકેટ ઝડપી હતી. અંતિમ ઓવરોમાં ન્યૂઝીલેન્ડના કેપ્ટન મિશેલ સેન્ટનરે એકલા હાથે લડત આપીને ૪૭ રનની મહત્વપૂર્ણ ઈનિંગ રમી હતી, જેના કારણે ન્યૂઝીલેન્ડ ૨૦૦ રનનો આંકડો પાર કરવામાં સફળ રહ્યું હતું.
ટીમના સમાચાર મુજબ, અક્ષર પટેલને પાછલી મેચમાં ઈજા થઈ હોવાથી અને જસપ્રીત બુમરાહને આરામ આપવામાં આવ્યો હોવાથી આ મેચમાં ફેરફાર કરવામાં આવ્યા હતા. કેપ્ટન સૂર્યકુમાર યાદવની આગેવાની હેઠળની ભારતીય પ્લેઈંગ ઈલેવનમાં કુલદીપ યાદવ અને હર્ષિત રાણાનો સમાવેશ કરવામાં આવ્યો હતો. સામા પક્ષે ન્યૂઝીલેન્ડે પણ તેમની ટીમમાં ત્રણ ફેરફાર કર્યા હતા, જેમાં ટિમ સીફર્ટ, ઝેકરી ફોલ્ક્સ અને મેટ હેનરીનો સમાવેશ કરવામાં આવ્યો હતો