ગુવાહાટી : ભારતીય ક્રિકેટમાં રોહિત શર્માની નિવૃત્તિ બાદ ઓપનિંગમાં જે ખાલીપો દેખાતો હતો, તેને પંજાબના યુવા બેટ્સમેન અભિષેક શર્માએ પોતાની આક્રમક બેટિંગથી ભરી દીધો છે. ન્યૂઝીલેન્ડ સામેની ત્રીજી T20 મેચમાં અભિષેકે એવી ઇનિંગ રમી કે જેને ક્રિકેટ પ્રેમીઓ વર્ષો સુધી યાદ રાખશે. માત્ર 20 બોલમાં અણનમ 68 રન બનાવીને તેણે ભારતને માત્ર 10 ઓવરમાં 153 રનનો વિશાળ લક્ષ્યાંક પાર કરાવી દીધો હતો. નવાઈની વાત એ છે કે આ આખી ઇનિંગમાં તેણે એક પણ 'ડોટ બોલ' રમ્યો નહોતો!
અભિષેકની આ રમતને અત્યારે ટી-20 વર્લ્ડ કપ માટે ભારતનો 'ચીટ કોડ' માનવામાં આવી રહ્યો છે. તેણે માત્ર 14 બોલમાં ફિફ્ટી ફટકારી, જે તેના માર્ગદર્શક યુવરાજ સિંહ પછી ભારત માટે બીજી સૌથી ઝડપી અડધી સદી છે. 25 વર્ષીય આ ડાબોડી બેટ્સમેન હવે T20I માં 1,000 રન પૂરા કરનાર સૌથી ઝડપી ભારતીય બેટ્સમેન બની ગયો છે. તેનો 195.22 નો સ્ટ્રાઇક રેટ દુનિયાભરના બોલરો માટે ફફડાટ સમાન છે. તેની રમતમાં રોહિત શર્મા જેવી નિડરતા અને યુવી જેવી તાકાત જોવા મળી રહી છે.
એશિયા કપમાં પણ અભિષેકે પોતાની ઉપયોગિતા સાબિત કરી હતી, જ્યાં તેણે 200 ના સ્ટ્રાઇક રેટથી 314 રન બનાવીને ભારતને વિજેતા બનાવવામાં મહત્વની ભૂમિકા ભજવી હતી. તે માત્ર બેટિંગ જ નહીં, પણ જરૂર પડે ત્યારે ડાબા હાથે સ્પિન બોલિંગ કરીને પણ ટીમને સંતુલન આપે છે. IPL માં સનરાઇઝર્સ હૈદરાબાદ તરફથી રમતા જે વિસ્ફોટક ફોર્મ તેણે બતાવ્યું હતું, તે હવે આંતરરાષ્ટ્રીય સ્તરે પણ યથાવત છે.
આગામી T20 વર્લ્ડ કપ ભારતમાં જ યોજાવાનો છે, ત્યારે અભિષેક શર્મા જેવો આક્રમક ઓપનર ભારતને સતત બીજી વાર વિશ્વ વિજેતા બનાવવામાં સૌથી મોટું હથિયાર સાબિત થઈ શકે છે. તેની 'હાઈ રિસ્ક-હાઈ રિવોર્ડ' ગેમ અત્યારે ફેન્સના દિલ જીતી રહી છે અને તે વિશ્વના નંબર-1 T20 બેટ્સમેન તરીકે વર્લ્ડ કપમાં પ્રવેશ કરવા માટે સજ્જ છે.