નવી દિલ્હી : વર્ષ 2026 ના T20 વર્લ્ડ કપની પિચ પર મેચ શરૂ થાય તે પહેલા જ મેદાનની બહાર ‘ગુગલી’ ફેંકવામાં આવી રહી છે. સુરક્ષાના કારણોસર ભારતનો પ્રવાસ કરવાનો ઈનકાર કરનાર બાંગ્લાદેશને ICC એ ટૂર્નામેન્ટમાંથી બહાર કરી દીધું હતું, પરંતુ હવે એક નવો વળાંક આવ્યો છે. અહેવાલો મુજબ, જો પાકિસ્તાન બાંગ્લાદેશના સમર્થનમાં વર્લ્ડ કપનો બહિષ્કાર કરશે, તો ICC બાંગ્લાદેશને ફરીથી ટૂર્નામેન્ટમાં સામેલ કરી શકે છે.
આ સમગ્ર વિવાદ પાકિસ્તાન પર નિર્ભર છે. પાકિસ્તાન ક્રિકેટ બોર્ડ (PCB) ના વડા મોહસીન નકવીએ બાંગ્લાદેશને બહાર રાખવાને ‘અન્યાય’ ગણાવ્યો છે અને તેઓ ભારત ન આવવા પર વિચાર કરી રહ્યા છે. જો પાકિસ્તાન હટી જાય, તો ICC બાંગ્લાદેશને ગ્રુપ-A માં તેમની જગ્યાએ રમાડશે અને આ મેચો ભારતને બદલે શ્રીલંકામાં યોજવામાં આવશે. આનાથી લોજિસ્ટિકલ સમસ્યાઓ પણ ઓછી થશે અને બાંગ્લાદેશની ટીમ ફરી મેદાનમાં જોવા મળશે.
જોકે, આ મામલો ઘણો પેચીદો છે. જો પાકિસ્તાન રમવાનો ઈનકાર કરે છે, તો તે BCCI, ICC અને પાકિસ્તાન વચ્ચે થયેલા ‘હાઈબ્રિડ મોડેલ’ કરારનું ઉલ્લંઘન ગણાશે. પાકિસ્તાની મીડિયામાં એવી પણ ચર્ચા છે કે પાકિસ્તાન આખી ટૂર્નામેન્ટ નહીં, પણ 15 ફેબ્રુઆરીએ કોલંબોમાં ભારત સામે રમાનારી હાઈ-વોલ્ટેજ મેચનો જ બહિષ્કાર કરવાનું વિચારી રહ્યું છે.
ટૂર્નામેન્ટ શરૂ થવાને હવે માત્ર 10 દિવસ બાકી છે ત્યારે મોહસીન નકવી આગામી શુક્રવાર કે સોમવાર સુધીમાં અંતિમ નિર્ણય લેશે. પાકિસ્તાનનો આ નિર્ણય નક્કી કરશે કે વર્લ્ડ કપના મેદાન પર કોણ બેટિંગ કરશે – પાકિસ્તાની ખેલાડીઓ કે પછી નસીબના જોરે પાછું ફરેલું બાંગ્લાદેશ? વિશ્વભરના ક્રિકેટ ચાહકોની નજર અત્યારે PCB ના ‘યસ’ કે ‘નો’ પર ટકેલી છે.