લાહોર, તા. 28 : આગામી T20 વર્લ્ડ કપ ૨૦૨૬ શરૂ થવાને હવે ગણતરીના દિવસો બાકી છે, પરંતુ પાકિસ્તાન ક્રિકેટ બોર્ડ (PCB) તેના અવનવા વિવાદો અને જીદને કારણે સતત ચર્ચામાં છે. એક લેટેસ્ટ અહેવાલ મુજબ, જો પાકિસ્તાન વર્લ્ડ કપ રમવા માટે ભારત આવશે, તો તેના ખેલાડીઓ મેદાન પર હાથ પર 'કાળી પટ્ટી' બાંધીને ઉતરશે. આ પગલું બાંગ્લાદેશને વર્લ્ડ કપમાંથી બહાર રાખવાના ICC ના નિર્ણય સામે વિરોધ પ્રદર્શિત કરવા માટે લેવામાં આવનાર હોવાનું જાણવા મળ્યું છે.
શું છે સમગ્ર વિવાદ?
બાંગ્લાદેશે સુરક્ષાના કારણોસર ભારતમાં રમવાનો ઇનકાર કર્યો હતો અને તેની મેચો અન્ય દેશમાં ખસેડવા માંગ કરી હતી. જોકે, ICC એ આ માંગણી પાયાવિહોણી ગણીને ફગાવી દીધી અને બાંગ્લાદેશની જગ્યાએ સ્કોટલેન્ડને વર્લ્ડ કપમાં સ્થાન આપી દીધું. પાકિસ્તાન હવે આ મુદ્દે બાંગ્લાદેશના સમર્થનમાં આવ્યું છે. PCB હવે ICC ને પત્ર લખીને જાણ કરશે કે તેઓ આ નિર્ણયથી અત્યંત નિરાશ છે અને ટૂર્નામેન્ટ દરમિયાન 'પ્રતીકાત્મક વિરોધ' નોંધાવશે.
સોમવારે લેવાશે આખરી નિર્ણય
પાકિસ્તાન વર્લ્ડ કપમાં ભાગ લેશે કે નહીં, તેનો અંતિમ નિર્ણય સોમવારે લેવામાં આવે તેવી શક્યતા છે. PCB ના વડા મોહસીન નકવીએ તાજેતરમાં વડાપ્રધાન શાહબાઝ શરીફ સાથે મુલાકાત કરી હતી. પાકિસ્તાન સરકાર તરફથી લીલી ઝંડી મળ્યા બાદ જ ટીમ ઇન્ડિયાના પ્રવાસે આવશે. જો પાકિસ્તાન બહિષ્કાર કરે છે, તો ICC અને ભારત સામેના તેમના ક્રિકેટ સંબંધો વધુ વણસી શકે છે.
વર્લ્ડ કપ પહેલા PAK vs AUS જંગ
એક તરફ વર્લ્ડ કપ પર અનિશ્ચિતતાના વાદળો છે, ત્યારે બીજી તરફ મિશેલ માર્શની આગેવાની હેઠળની ઓસ્ટ્રેલિયન ટીમ બુધવારે લાહોર પહોંચી ગઈ છે. પાકિસ્તાન અને ઓસ્ટ્રેલિયા વચ્ચે ૨૯ જાન્યુઆરીથી ત્રણ મેચની T20 શ્રેણી શરૂ થશે. આ શ્રેણીને વર્લ્ડ કપની તૈયારી તરીકે જોવામાં આવી રહી છે, પરંતુ પાકિસ્તાની ફેન્સની નજર તો એ વાત પર છે કે તેમની ટીમ ભારતની ધરતી પર ચોગ્ગા-છગ્ગા ફટકારવા જશે કે નહીં?