વિજક આન ઝી (નેધરલેન્ડ્સ), તા. 28 : નેધરલેન્ડ્સમાં રમાઈ રહેલી પ્રતિષ્ઠિત 'ટાટા સ્ટીલ માસ્ટર્સ' ચેસ ટુર્નામેન્ટમાં ભારત માટે નવમો રાઉન્ડ ઉતાર-ચઢાવવાળો રહ્યો છે. વિશ્વ ચેમ્પિયન ડી. ગુકેશ માટે આ ટુર્નામેન્ટ અત્યાર સુધી સંઘર્ષપૂર્ણ રહી છે, અને ગત રાત્રે ફરી એકવાર તેને હારનો સ્વાદ ચાખવો પડ્યો છે.
ગુકેશની વ્યુહરચના નિષ્ફળ
વ્હાઇટ પીસ (સફેદ મહોરા) સાથે રમી રહેલા ગુકેશે 'બિશપ ઓપનિંગ' સાથે રમતની શરૂઆત કરી હતી, જે સામાન્ય રીતે ટોચના સ્તરની સ્પર્ધાઓમાં ઓછી જોવા મળે છે. જોકે, જર્મનીના મેથિયાસ બ્લુબૌમે ગુકેશની આ ચાલનો સચોટ જવાબ આપ્યો હતો. બ્લુબૌમે કલ્પનાશીલ રમત બતાવી ગુકેશના ઊંટને જ ફસાવી દીધું હતું. અંતે 37મી ચાલે ગુકેશે હાર સ્વીકારી લીધી હતી. હાલ ગુકેશ 4 પોઈન્ટ સાથે પોઈન્ટ ટેબલમાં પાછળ ચાલી રહ્યો છે.
પ્રજ્ઞાનંધાનો ઉદય અને અર્જુનનો ડ્રો
ભારત માટે સારા સમાચાર આર. પ્રજ્ઞાનંધા તરફથી આવ્યા છે. તેણે પોતાના જ દેશબંધુ અરવિંદ ચિથમ્બરમને હરાવીને આ ટુર્નામેન્ટમાં પોતાની પ્રથમ જીત નોંધાવી છે. જોકે, પ્રજ્ઞાનંધા માટે આ વિજય થોડો મોડો આવ્યો હોય તેમ જણાય છે. બીજી તરફ, ટોચનો ક્રમાંકિત અર્જુન એરિગાઇસી અમેરિકાના હાન્સ નીમેન સામે જીતવા માટે સંઘર્ષ કરતો જોવા મળ્યો હતો, પરંતુ અંતે 22 ચાલો બાદ રમત ડ્રોમાં પરિણમી હતી.
પોઈન્ટ ટેબલની સ્થિતિ
હાલ ઉઝબેકિસ્તાનનો નોદિરબેક અબ્દુસત્તોરોવ 6 પોઈન્ટ સાથે મોખરે છે. જોકે, આ ટુર્નામેન્ટમાં સૌથી વધુ ચર્ચા 14 વર્ષીય તુર્કીના ખેલાડી યાગીઝ કાન એર્ગોડમસની થઈ રહી છે, જે 5.5 પોઈન્ટ સાથે બીજા ક્રમે છે અને ચેસ જગતના ઇતિહાસમાં સૌથી મજબૂત 14 વર્ષીય ખેલાડી તરીકે ઉભરી રહ્યો છે. હવે ટુર્નામેન્ટમાં માત્ર ચાર રાઉન્ડ બાકી છે, ત્યારે ભારતીય ખેલાડીઓ વાપસી કરે છે કે કેમ તેના પર સૌની નજર રહેશે.