વિશાખાપટ્ટનમ: ભારત અને ન્યૂઝીલેન્ડ વચ્ચે રમાઈ રહેલી ચોથી T20 મેચમાં ટીમ ઈન્ડિયાને મોટો આંચકો લાગ્યો છે. શ્રેણીમાં શાનદાર વાપસી કરનાર ડાબોડી બેટ્સમેન ઈશાન કિશન ઈજાના કારણે ચોથી મેચમાંથી બહાર થઈ ગયો છે. કેપ્ટન સૂર્યકુમાર યાદવે ટોસ સમયે ખુલાસો કર્યો હતો કે ત્રીજી T20 દરમિયાન ઈશાનને ઈજા થઈ હતી, જેના કારણે તે આજે મેદાનમાં ઉતરી શક્યો નથી. તેની ગેરહાજરીમાં ભારતે પ્લેઈંગ-11 માં ફેરફાર કરવો પડ્યો છે.
ઈશાન કિશને આ શ્રેણીમાં પોતાની આક્રમક બેટિંગથી તમામને પ્રભાવિત કર્યા છે. રાયપુરમાં રમાયેલી મેચમાં તેણે તોફાની ૭૬ રન ફટકાર્યા હતા અને ગુવાહાટીમાં પણ ૨૮ રનનું યોગદાન આપ્યું હતું. તેની આ શાનદાર રમત હવે સંજુ સેમસન માટે ચિંતાનો વિષય બની ગઈ છે. સેમસન શ્રેણીની ત્રણેય મેચમાં ફ્લોપ સાબિત થયો છે, જ્યારે ઈશાન કિશને પોતાની દાવેદારી મજબૂત કરી લીધી છે. ભલે ઈજાના કારણે ઈશાન આ મેચ નથી રમી રહ્યો, પણ વર્લ્ડ કપ પહેલા તેણે પસંદગીકારોનું ધ્યાન ખેંચ્યું છે.
: ચોથી T20 માટે ભારતીય ટીમમાં હાર્દિક પંડ્યા, સૂર્યકુમાર યાદવ અને જસપ્રીત બુમરાહ જેવા સ્ટાર ખેલાડીઓ હાજર છે. ઈશાનની ગેરહાજરીમાં બેટિંગ લાઈનઅપમાં થોડો ફેરફાર જોવા મળશે.
• ટીમ ઈન્ડિયા: અભિષેક શર્મા, સંજુ સેમસન, સૂર્યકુમાર યાદવ (કેપ્ટન), રિંકુ સિંહ, હાર્દિક પંડ્યા, શિવમ દુબે, હર્ષિત રાણા, રવિ બિશ્નોઈ, કુલદીપ યાદવ, અર્શદીપ સિંહ અને જસપ્રીત બુમરાહ.
• ન્યૂઝીલેન્ડ: ટિમ સાઈફર્ટ, ડેવોન કોનવે, રચિન રવીન્દ્ર, ગ્લેન ફિલિપ્સ, માર્ક ચેપમેન, ડેરીલ મિશેલ, મિશેલ સેન્ટનર, જેક ફોલ્ક્સ, મેટ હેનરી, ઈશ સોઢી અને જેકબ ડફી.
૭ ફેબ્રુઆરીથી શરૂ થતા T20 વર્લ્ડ કપ પહેલા ઈશાન કિશનની આ ઈજા કેટલી ગંભીર છે તેના પર સૌની નજર રહેશે.