વોશિંગ્ટન, તા.૩૦: અમેરિકાના વોશિંગ્ટનમાં રમાઈ રહેલી 'સ્ક્વોશ ઓન ફાયર ઓપન'માં ભારતના ઉભરતા સ્ટાર વીર ચોત્રાણીએ ઈતિહાસ રચી દીધો છે. વિશ્વમાં ૪૯મો ક્રમાંક ધરાવતા ચોત્રાણીએ પોતાની કારકિર્દીની સૌથી મોટી જીત મેળવતા ફ્રાન્સના દિગ્ગજ અને વિશ્વના ૧૯મા ક્રમાંકિત ખેલાડી બાપ્ટિસ્ટ માસોટ્ટીને હારનો સ્વાદ ચખાડ્યો છે.
આ મુકાબલો અત્યંત રોમાંચક રહ્યો હતો. ચોત્રાણીએ પ્રથમ ગેમ ૧૧-૬થી જીતીને મજબૂત શરૂઆત કરી હતી, પરંતુ માસોટ્ટીએ વાપસી કરતા આગામી બે ગેમ જીતી લીધી હતી. જોકે, હાર ન માનતા ભારતીય ખેલાડીએ ચોથી ગેમમાં ૧૧-૧થી એકતરફી વિજય મેળવી સ્કોર સરભર કર્યો હતો. અંતિમ અને નિર્ણાયક પાંચમી ગેમમાં ૧૧-૯થી જીત મેળવી વીર ચોત્રાણીએ ક્વાર્ટર ફાઇનલમાં પ્રવેશ કર્યો છે, જ્યાં હવે તેનો સામનો ઇંગ્લેન્ડના ડેકલાન જેમ્સ સામે થશે.
 
અનાહત સિંહની વિજયી કૂચ
મહિલા વર્ગમાં પણ ભારત માટે ખુશીના સમાચાર આવ્યા છે. સાતમો ક્રમાંક ધરાવતી ૧૭ વર્ષીય ભારતીય સનસનાટી અનાહત સિંહે બીજા રાઉન્ડમાં દક્ષિણ આફ્રિકાની હેલી વોર્ડને ૧૧-૫, ૧૧-૮, ૧૨-૧૪, ૧૧-૫ થી હરાવી હતી. અનાહત હવે ક્વાર્ટર ફાઇનલમાં ઇજિપ્તની મજબૂત ખેલાડી સના ઇબ્રાહિમ સામે ટકરાશે. જોકે, પુરૂષ વર્ગમાં અન્ય એક ભારતીય ખેલાડી વેલાવન સેન્થિલકુમારને મેક્સિકોના લિયોનેલ કાર્ડેનાસ સામે હારનો સામનો કરવો પડ્યો હતો.
ભારતીય ચાહકોને આશા છે કે વીર અને અનાહત પોતાની આ લય જાળવી રાખીને ટાઇટલ જીતવામાં સફળ રહેશે.