બેંગકોક: બેડમિન્ટન કોર્ટ પર ભારતની નવી પેઢીના ખેલાડીઓ પોતાનો પરચમ લહેરાવી રહ્યા છે. બેંગકોકના નિમિબુટર સ્ટેડિયમ ખાતે રમાઈ રહેલી થાઈલેન્ડ માસ્ટર્સ 2026 ટુર્નામેન્ટમાં ભારતની ઉભરતી સ્ટાર દેવિકા સિહાગે શાનદાર પ્રદર્શન કરતા સેમિફાઇનલમાં પ્રવેશ કરી લીધો છે. આજે બપોરે ભારતીય સમય અનુસાર ૧:૪૫ વાગ્યે તેનો સામનો ચાઈનીઝ તાઈપેઈની પાંચમો ક્રમાંક ધરાવતી હુઆંગ યુ હસુન સામે થશે.
જાયન્ટ કિલર બની દેવિકા
દેવિકા સિહાગ અત્યારે જબરદસ્ત ફોર્મમાં છે. તેણે ક્વાર્ટર ફાઇનલમાં મોટો ઉલટફેર કરતા વિશ્વની ૧૬માં નંબરની ખેલાડી અને થાઈલેન્ડની ફેવરિટ સુપાનિદા કેટેથોંગને હરાવીને બધાને ચોંકાવી દીધા હતા. સ્થાનિક ખેલાડીને તેના જ દેશમાં હરાવ્યા બાદ હવે દેવિકાના આત્મવિશ્વાસમાં જોરદાર ઉછાળો આવ્યો છે અને તે ગોલ્ડ મેડલની પ્રબળ દાવેદાર માનવામાં આવી રહી છે.
અન્ય ભારતીય ખેલાડીઓ માટે નિરાશા
એક તરફ દેવિકાની જીતનો આનંદ છે, તો બીજી તરફ અન્ય ભારતીય ખેલાડીઓ માટે આ ટુર્નામેન્ટના દ્વાર બંધ થયા છે.
•    ઇશારાની બરુઆ: મહિલા સિંગલ્સની રોમાંચક ક્વાર્ટર ફાઇનલમાં ઇશારાનીએ મલેશિયાની વોંગ લિંગ ચિંગ સામે જોરદાર લડત આપી હતી, પરંતુ અંતે ૧૮-૨૧, ૨૧-૧૬, ૨૧-૧૩ થી પરાજય થયો હતો.
•    પુરુષ સિંગલ્સ: પુરુષોની શ્રેણીમાં ભારતનો પડકાર ક્વાર્ટર ફાઇનલમાં જ પૂરો થઈ ગયો છે. ભારતનો થરૂન માનેપલ્લી ચીનના ઝુ ઝુઆન ચેન સામે ૧૧-૨૧, ૧૭-૨૧ થી સીધી ગેમમાં હારીને બહાર ફેંકાઈ ગયો હતો.
હવે આખી ટુર્નામેન્ટમાં ભારતની આશા માત્ર દેવિકા સિહાગ પર ટકેલી છે. જો દેવિકા આજની સેમિફાઇનલ જીતવામાં સફળ રહે છે, તો તે કારકિર્દીના એક મોટા પડાવ પર પહોંચી જશે.