તિરુવનંતપુરમ: ભારત અને ન્યુઝીલેન્ડ વચ્ચે રમાયેલી પાંચમી અને અંતિમ ટી-20 મેચમાં ભારતીય બેટ્સમેનોએ કીવી બોલરોની બરાબરની ધોલાઈ કરીને મેદાનમાં ચોગ્ગા-છગ્ગાની રમઝટ બોલાવી દીધી હતી. કેપ્ટન સૂર્યકુમાર યાદવે ટોસ જીતીને પ્રથમ બેટિંગ કરવાનો નિર્ણય કર્યો હતો, જે ટીમ ઇન્ડિયાના યુવા બેટ્સમેનોએ સાચો સાબિત કર્યો હતો. ભારતે નિર્ધારિત 20 ઓવરમાં 5 વિકેટ ગુમાવીને 271 રનનો વિશાળ સ્કોર ખડક્યો હતો, જે ટી-20 ઇન્ટરનેશનલમાં ફુલ મેમ્બર ટીમ સામે પાંચમો સૌથી મોટો સ્કોર છે.
ઇશાન કિશનની ઐતિહાસિક તોફાની ઈનિંગ
ટીમ ઇન્ડિયાના વિસ્ફોટક ઓપનર ઇશાન કિશને પોતાની કારકિર્દીની શ્રેષ્ઠ ઈનિંગ રમી હતી. તેણે માત્ર 42 બોલમાં સદી ફટકારી હતી. પોતાની 103 રનની તોફાની ઈનિંગમાં તેણે 10 છગ્ગા અને 6 ચોગ્ગા ફટકાર્યા હતા. ન્યુઝીલેન્ડ સામે ટી-20માં કોઈ પણ બેટ્સમેન દ્વારા ફટકારવામાં આવેલી આ સૌથી ઝડપી સદી છે. ભારત માટે પણ આ પાંચમી સૌથી ઝડપી ટી-20 સેન્ચુરી બની ગઈ છે.
સૂર્યાનો 'વર્લ્ડ રેકોર્ડ': સૌથી ઝડપી 3000 રન
મેદાનની ચારેબાજુ શૉટ્સ ફટકારવા માટે જાણીતા કેપ્ટન સૂર્યકુમાર યાદવે આ મેચમાં એક મોટો માઇલસ્ટોન હાંસલ કર્યો છે. તેણે માત્ર 1822 બોલમાં ટી-20 ઇન્ટરનેશનલમાં પોતાના 3000 રન પૂરા કર્યા છે. આ સાથે તેણે યુએઈના મોહમ્મદ વસીમનો (1947 બોલ) રેકોર્ડ તોડીને વિશ્વના સૌથી ઝડપી 3000 રન બનાવનાર બેટ્સમેન બનવાનું ગૌરવ પ્રાપ્ત કર્યું છે. સૂર્યાએ આ મેચમાં 30 બોલમાં 63 રનની ઇનિંગ રમી હતી.
ડેથ ઓવર્સમાં હાર્દિકનો આતંક
અંતિમ ઓવરોમાં હાર્દિક પંડ્યાએ પણ પોતાની તાકાત બતાવી હતી. તેણે માત્ર 17 બોલમાં 42 રન ફટકારીને ટીમના સ્કોરને 270ને પાર પહોંચાડ્યો હતો. મધ્ય ઓવરોમાં (11થી 15 ઓવર વચ્ચે) ભારતીય બેટ્સમેનોએ 86 રન લૂંટ્યા હતા, જે ભારતનો ટી-20 ઇતિહાસનો બીજો સૌથી મોટો મધ્ય ઓવરનો સ્કોર છે.