મુંબઈ, તા. 7 : ક્રિકેટના મહાકુંભ સમાન આઈસીસી ટી20 વર્લ્ડ કપ 2026નો પ્રારંભ થઈ ચૂક્યો છે. આજે મુંબઈના ઐતિહાસિક વાનખેડે સ્ટેડિયમ ખાતે યજમાન અને ડિફેન્ડિંગ ચેમ્પિયન ભારત પોતાની પ્રથમ મેચમાં યુએસએ સામે ટકરાશે. ભારતીય સમય મુજબ આ મેચ સાંજે 7:00 વાગ્યે શરૂ થશે, જ્યારે ટોસ પ્રક્રિયા સાંજે 6:30 વાગ્યે હાથ ધરવામાં આવશે. સૂર્યકુમાર યાદવના નેતૃત્વમાં ભારતીય ટીમ પોતાની ચેમ્પિયનશીપ જાળવી રાખવાના ઈરાદે મેદાનમાં ઉતરશે.
યુવા ખેલાડીઓ પર રહેશે નજર:
રોહિત શર્મા અને વિરાટ કોહલી જેવા સિનિયર ખેલાડીઓની ગેરહાજરીમાં આ વખતે ભારતીય ટીમમાં યુવા અને આક્રમક ખેલાડીઓનું વર્ચસ્વ જોવા મળી રહ્યું છે. ઓપનિંગમાં અભિષેક શર્મા અને મિડલ ઓર્ડરમાં તિલક વર્મા તેમજ રિંકુ સિંહ પાસેથી વિસ્ફોટક બેટિંગની અપેક્ષા રાખવામાં આવી રહી છે. બોલિંગ વિભાગની કમાન અનુભવી જસપ્રિત બુમરાહ અને અર્શદીપ સિંહના હાથમાં રહેશે, જેઓ યુએસએના બેટ્સમેનોની કસોટી કરશે. સામી તરફ યુએસએની ટીમ પણ મોનાંક પટેલના નેતૃત્વમાં ભારતને સખત ટક્કર આપવા માટે ઉત્સાહિત છે.
બંને દેશોની સંભવિત પ્લેઈંગ ઈલેવન:
ભારતીય ટીમમાં અભિષેક શર્મા, ઈશાન કિશન (વિકેટકીપર), તિલક વર્મા, સૂર્યકુમાર યાદવ (કેપ્ટન), શિવમ દુબે, રિંકુ સિંહ, હાર્દિક પંડ્યા, અક્ષર પટેલ, જસપ્રિત બુમરાહ, અર્શદીપ સિંહ અને વરુણ ચક્રવર્તીનો સમાવેશ થઈ શકે છે. જ્યારે યુએસએની ટીમમાં મોનાંક પટેલ (કેપ્ટન અને વિકેટકીપર), એન્ડ્રિસ ગૌસ, સૈતેજા મુક્કલ્લા, શયાન જહાંગીર, મિલિંદ કુમાર, હરમીત સિંહ, શુભમ રાંજને, સંજય કૃષ્ણમૂર્તિ, મોહમ્મદ મોહસીન, શેડલી વાન શૌકવિક અને સૌરભ નેત્રાવલકર મેદાનમાં ઉતરી શકે છે.
હાઈ-સ્કોરિંગ મેચની શક્યતા:
વાનખેડે સ્ટેડિયમની પિચ હંમેશા બેટ્સમેનો માટે સ્વર્ગ સમાન માનવામાં આવે છે, જેના કારણે આજે એક હાઈ-સ્કોરિંગ મેચ જોવા મળી શકે છે. ક્રિકેટ ચાહકો આ રોમાંચક મેચનું જીવંત પ્રસારણ સ્ટાર સ્પોર્ટ્સ નેટવર્ક અને JioHotstar એપ પર નિહાળી શકશે.