નવી દિલ્હી: આઈસીસી ટી20 વર્લ્ડ કપ 2026ના પ્રારંભિક દિવસે જ ક્રિકેટ ચાહકોને મોટો રોમાંચ જોવા મળ્યો છે. વેસ્ટ ઇન્ડીઝના ઓલરાઉન્ડર રોમારિયો શેફર્ડે ટુર્નામેન્ટના બીજા જ મુકાબલામાં હેટ્રિક ઝડપીને સનસનાટી મચાવી દીધી છે. સ્કોટલેન્ડ વિરુદ્ધ રમાયેલી આ મેચમાં શેફર્ડે પોતાની ઘાતક બોલિંગના જોરે ઇતિહાસના પાનામાં પોતાનું નામ નોંધાવી દીધું છે.
શેફર્ડે સ્કોટલેન્ડની ઇનિંગ્સની 17મી ઓવરમાં સતત ત્રણ બોલ પર ત્રણ વિકેટ ઝડપીને આ સિદ્ધિ મેળવી હતી. આ સાથે જ તે ટી20 વર્લ્ડ કપના ઇતિહાસમાં હેટ્રિક લેનારો વિશ્વનો 9મો અને વેસ્ટ ઇન્ડીઝ તરફથી આ પરાક્રમ કરનારો સૌપ્રથમ બોલર બની ગયો છે. વર્લ્ડ કપના પહેલા જ દિવસે જોવા મળેલી આ હેટ્રિકે ટુર્નામેન્ટમાં રોમાંચના સ્તરને ચરમસીમાએ પહોંચાડી દીધું છે.
વેસ્ટ ઇન્ડીઝના ચાહકો માટે આ ગર્વની ક્ષણ છે, કારણ કે અત્યાર સુધી દિગ્ગજ વેસ્ટ ઇન્ડિયન બોલરો જે કામ નહોતા કરી શક્યા, તે યુવા રોમારિયો શેફર્ડે કરી બતાવ્યું છે. તેની આ હેટ્રિકથી સ્કોટલેન્ડની ટીમ સંપૂર્ણપણે બેકફૂટ પર આવી ગઈ હતી અને વેસ્ટ ઇન્ડીઝની પકડ મજબૂત બની હતી.
 
ટી20 વર્લ્ડ કપમાં હેટ્રિક લેનાર બોલરોની યાદી (કુલ 9):
1.    બ્રેટ લી (ઓસ્ટ્રેલિયા)
2.    કર્ટિસ કેમ્ફર (આયર્લેન્ડ)
3.    વાનિન્દુ હસરંગા (શ્રીલંકા)
4.    કાગીસો રબાડા (દક્ષિણ આફ્રિકા)
5.    કાર્તિક મયપ્પન (UAE)
6.    જોશ લિટલ (આયર્લેન્ડ)
7.    પેટ કમિન્સ (ઓસ્ટ્રેલિયા) - બે વાર
8.    ક્રિસ જોર્ડન (ઇંગ્લેન્ડ)
9.    રોમારિયો શેફર્ડ (વેસ્ટ ઇન્ડીઝ) - ફેબ્રુઆરી 2026