મુંબઈ  : ટી20 વિશ્વ કપ 2026ના રસાકસીભર્યા મુકાબલામાં ભારતે અમેરિકાને ૨૯ રને હરાવીને ટૂર્નામેન્ટમાં શાનદાર શરૂઆત કરી છે. મુંબઈના વાનખેડે સ્ટેડિયમ ખાતે રમાયેલી આ મેચમાં એક સમયે વિશ્વની નંબર વન ટીમ ભારત મુશ્કેલીમાં મુકાઈ ગયું હતું, પરંતુ કેપ્ટન સૂર્યકુમાર યાદવની શાનદાર બેટિંગ અને બોલરોની શિસ્તબદ્ધ બોલિંગના જોરે ભારતે વિજય મેળવ્યો છે. ભારતે નિર્ધારિત ૨૦ ઓવરમાં ૯ વિકેટે ૧૬૧ રન બનાવ્યા હતા, જેના જવાબમાં અમેરિકાની ટીમ ૨૦ ઓવરમાં ૮ વિકેટ ગુમાવીને માત્ર ૧૩૨ રન જ બનાવી શકી હતી.
સૂર્યાની કેપ્ટન ઇનિંગ અને અમેરિકાનો પડકાર:
અમેરિકાના કેપ્ટન મોનાંક પટેલે ટોસ જીતીને પ્રથમ બોલિંગ કરવાનો નિર્ણય લીધો હતો. લાલ માટીની પીચ પર બોલ રોકાઈને આવતો હોવાથી ભારતીય બેટ્સમેનો રન બનાવવા માટે ઝઝૂમતા જોવા મળ્યા હતા. ઓપનર અભિષેક શર્મા શૂન્ય રને આઉટ થતા ભારતને મોટો ઝટકો લાગ્યો હતો. એક તબક્કે ૫.૧ ઓવરમાં ૪૫ રન બનાવનાર ભારતે વેનના સ્પેલમાં ૩ વિકેટ ગુમાવી દેતા સ્કોર ૪ વિકેટે ૪૬ રન થઈ ગયો હતો. ઈશાન કિશન (૨૦), તિલક વર્મા (૨૫) અને શિવમ દુબે (૦) સસ્તામાં આઉટ થયા હતા. જોકે, કેપ્ટન સૂર્યકુમાર યાદવે એક છેડો સાચવી રાખી ૪૯ બોલમાં ૧૦ ચોગ્ગા અને ૪ છગ્ગાની મદદથી અણનમ ૮૪ રન ફટકારી સ્કોરને ૧૬૧ સુધી પહોંચાડ્યો હતો. અમેરિકા તરફથી શેડલી વૅન શાલ્કવિકે ૪ વિકેટ ઝડપી હતી.
ભારતીય બોલરોનો પલટવાર:
૧૬૨ રનના લક્ષ્યાંકનો પીછો કરવા ઉતરેલી અમેરિકાની ટીમ શરૂઆતથી જ દબાણમાં જોવા મળી હતી. મોહમ્મદ સિરાજે એન્ડ્રીજ ગૂસ (૬) અને સૈતેજા મુક્કમલ્લા (૨) ને આઉટ કરીને અમેરિકાની કમર તોડી નાખી હતી. અર્શદીપ સિંહે કેપ્ટન મોનાંક પટેલને શૂન્ય રને પેવેલિયન ભેગો કર્યો હતો. અમેરિકા તરફથી મિલિંદ કુમાર (૩૪) અને સંજય કૃષ્ણમૂર્તિ (૩૭) વચ્ચે ૫૮ રનની ભાગીદારી થઈ હતી, પરંતુ વરુણ ચક્રવર્તીએ મિલિંદને સ્ટમ્પ આઉટ કરાવી આ જોડી તોડી હતી. અક્ષર પટેલે એક જ ઓવરમાં બે વિકેટ ઝડપી અમેરિકાની જીતની આશા પર પાણી ફેરવી દીધું હતું.
ઐતિહાસિક સંદર્ભ અને આગામી મેચ:
નોંધનીય છે કે ૨૦૨૪ના વર્લ્ડ કપમાં પણ અમેરિકાએ ભારતને સખત ટક્કર આપી હતી અને તે મેચમાં પણ સૂર્યકુમારે જ અડધી સદી ફટકારી ભારતને જીત અપાવી હતી. આ જીત સાથે ભારતે ગ્રુપ સ્ટેજમાં મહત્વના બે પોઈન્ટ મેળવ્યા છે. હવે ભારતીય ટીમ ૧૦ ફેબ્રુઆરીના રોજ દિલ્હીના અરુણ જેટલી સ્ટેડિયમ ખાતે નામીબિયા સામે ટકરાશે. ગૌતમ ગંભીરના માર્ગદર્શન હેઠળની આ યુવા ટીમનો આત્મવિશ્વાસ આ જીતથી બમણો થયો છે.