નવી દિલ્હી: T20 વર્લ્ડ કપ 2026 ના પ્રારંભ પહેલા જ ભારતીય ક્રિકેટ ચાહકો માટે એક નિરાશાજનક સમાચાર સામે આવ્યા છે. ટીમ ઈન્ડિયાના ઘાતક ફાસ્ટ બોલર હર્ષિત રાણા ઘૂંટણની ગંભીર ઈજાને કારણે આખી ટુર્નામેન્ટમાંથી બહાર થઈ ગયા છે. હર્ષિતે તાજેતરમાં જ તેના ઘૂંટણની સર્જરી કરાવી છે અને સોશિયલ મીડિયા પર હોસ્પિટલના બેડ પરથી પોતાની તસવીર શેર કરીને ચાહકોને આ જાણકારી આપી છે.
દક્ષિણ આફ્રિકા સામેની વોર્મ-અપ (પ્રેક્ટિસ) મેચ દરમિયાન હર્ષિત રાણાની ઈજા સામે આવી હતી. મેદાન પર માત્ર એક ઓવર ફેંકતી વખતે તે બે વાર વચ્ચે જ અટકી ગયો હતો અને અસહ્ય પીડાને કારણે તેનાથી રન-અપ લેવું પણ મુશ્કેલ બન્યું હતું. તેની હાલત જોઈને ટીમ મેનેજમેન્ટે તેને તાત્કાલિક મેદાનની બહાર મોકલી દીધો હતો. તપાસ બાદ જાણવા મળ્યું કે ઈજા ગંભીર છે અને સર્જરી સિવાય બીજો કોઈ વિકલ્પ નથી.
હર્ષિત રાણા શાનદાર ફોર્મમાં હતો અને ભારત માટે 'એક્સ-ફેક્ટર' સાબિત થઈ શકે તેમ હતો. તેની વિદાય બાદ પસંદગીકારોએ અનુભવી ફાસ્ટ બોલર મોહમ્મદ સિરાજને વર્લ્ડ કપ ટીમમાં સામેલ કર્યો છે. હર્ષિતે ઈન્સ્ટાગ્રામ પર લખ્યું કે, "સર્જરી સફળ રહી છે. હવે મારું પૂરું ધ્યાન જલ્દી સાજા થવા પર અને ફરીથી બ્લુ જર્સીમાં મેદાન પર ઉતરવા પર છે."
સુંદર પણ શંકાના દાયરામાં: માત્ર હર્ષિત જ નહીં, પણ ઓલરાઉન્ડર વોશિંગ્ટન સુંદર પણ ઈજા સામે ઝઝૂમી રહ્યો છે. જોકે, કેપ્ટન સૂર્યકુમાર યાદવે આશા વ્યક્ત કરી છે કે સુંદર જલ્દી જ રિકવર થઈને દિલ્હીમાં ટીમ સાથે જોડાશે. વર્લ્ડ કપ જેવી મોટી ટુર્નામેન્ટ પહેલા મુખ્ય ખેલાડીઓની ઈજા ભારતીય ટીમની રણનીતિ માટે મોટો પડકાર બની શકે છે.