કોલંબો: આઈસીસી મેન્સ ટી-૨૦ વર્લ્ડ કપમાં ઓસ્ટ્રેલિયાએ પોતાનું વર્ચસ્વ જાળવી રાખતા ૧૪મી મેચમાં આયર્લેન્ડને એકતરફી મુકાબલામાં ૬૭ રનથી કચડી નાખ્યું છે. કોલંબોના આર. પ્રેમદાસા સ્ટેડિયમ ખાતે રમાયેલી આ મેચમાં કાંગારૂ બોલરો નાથન એલિસ અને એડમ ઝામ્પાની જોડીએ આયરિશ બેટિંગ લાઇનઅપના કૂરચેકૂરચા ઉડાવી દીધા હતા. બંને દિગ્ગજ બોલરોએ ૪-૪ વિકેટ ઝડપીને આયર્લેન્ડને પેવેલિયન ભેગું કરી દીધું હતું.

કાંગારૂઓની મજબૂત બેટિંગ

ટોસ જીતીને પ્રથમ બેટિંગ પસંદ કરનાર ઓસ્ટ્રેલિયન ટીમની શરૂઆત મધ્યમ રહી હતી, પરંતુ માર્કસ સ્ટોઇનિસે ૪૫ રનની તોફાની ઇનિંગ રમીને ટીમને મજબૂત સ્થિતિમાં પહોંચાડી હતી. જોકે, સ્ટોઇનિસ પોતાની અડધી સદી ચૂકી ગયો હતો, પણ તેના અને અન્ય સાથી ખેલાડીઓના યોગદાનથી ઓસ્ટ્રેલિયાએ નિર્ધારિત ૨૦ ઓવરમાં ૬ વિકેટે ૧૮૨ રન બનાવી આયર્લેન્ડને ૧૮૩ રનનો કપરો ટાર્ગેટ આપ્યો હતો. આયર્લેન્ડ તરફથી માર્ક એડૈરે બે વિકેટ ઝડપી હતી.

એલિસ અને ઝામ્પાનો આતંક

૧૮૩ રનનો પીછો કરવા ઉતરેલી આયર્લેન્ડની ટીમ શરૂઆતથી જ દબાણમાં જોવા મળી હતી. કેપ્ટન પોલ સ્ટર્લિંગની ઇજા આયર્લેન્ડને મોંઘી પડી હતી. નાથન એલિસ અને મેથ્યુ કુહનેમેને એવી ધારદાર બોલિંગ કરી કે આયર્લેન્ડનો સ્કોર જોતજોતામાં ૨૭ રનમાં ૪ વિકેટ થઈ ગયો હતો. મધ્યમ ક્રમમાં લોર્કન ટકર (૨૪) અને જ્યોર્જ ડોકરેલ (૪૧) એ પ્રતિકાર કરવાની કોશિશ કરી, પણ જાદુઈ સ્પિનર એડમ ઝામ્પાએ તેમને ક્રિઝ પર ટકવા દીધા નહોતા. આખી આયરિશ ટીમ માત્ર ૧૧૫ રનમાં ઓલઆઉટ થઈ ગઈ હતી.

પોઈન્ટ ટેબલમાં ઓસ્ટ્રેલિયા મજબૂત

આ જીત સાથે ઓસ્ટ્રેલિયાએ ટૂર્નામેન્ટમાં પોતાની પકડ વધુ મજબૂત બનાવી છે, જ્યારે આયર્લેન્ડ માટે સેમીફાઇનલની રાહ વધુ મુશ્કેલ બની ગઈ છે. એલિસ અને ઝામ્પાની આ ૮ વિકેટોએ સાબિત કરી દીધું છે કે ઓસ્ટ્રેલિયા આ વર્લ્ડ કપ જીતવા માટે પ્રબળ દાવેદાર છે.