કોલંબો: ટી-20 વર્લ્ડ કપ 2026ના સૌથી મોટા અને હાઈ-વોલ્ટેજ જંગ માટે મંચ તૈયાર થઈ ગયો છે. આજે કોલંબોના આર. પ્રેમદાસા સ્ટેડિયમમાં જ્યારે ભારત અને પાકિસ્તાન આમને-સામને ટકરાશે, ત્યારે આખું વિશ્વ આ મેચ પર નજર ટેકવીને બેઠું હશે. આ મેચ માત્ર રમત નથી, પરંતુ બંને દેશો માટે વિજયની હેટ્રિક કરવાનો અને વર્લ્ડ કપમાં પોતાનું વર્ચસ્વ જાળવી રાખવાનો મોકો છે. કોલંબોની પીચ પરંપરાગત રીતે સ્પિનરોને મદદરૂપ રહી છે, જેના કારણે કેપ્ટન સૂર્યકુમાર યાદવ આજે એક ચોંકાવનારો નિર્ણય લઈ શકે છે. અર્શદીપ સિંહના સ્થાને કુલદીપ યાદવનો પ્લેઈંગ-11 માં સમાવેશ કરીને ભારત પાકિસ્તાન સામે 'સ્પિન એટેક' તેજ કરે તેવી પ્રબળ શક્યતા છે.

આ મેચમાં યુવા ઓપનર અભિષેક શર્માના રમવાને લઈને જે સસ્પેન્સ હતું, તેના પર ખુદ સૂર્યાએ પૂર્ણવિરામ મૂકી દીધું છે. પ્રેસ કોન્ફરન્સમાં સૂર્યાએ આડકતરી રીતે સ્પષ્ટ કર્યું છે કે અભિષેક આજે મેદાનમાં ઉતરશે અને પાકિસ્તાની બોલરોની લાઈન-લેન્થ બગાડવા માટે તૈયાર છે. બીજી તરફ, ટીમ ઈન્ડિયાની બોલિંગ વ્યૂહરચનામાં મોટો ફેરફાર જોવા મળી શકે છે. જસપ્રીત બુમરાહ મુખ્ય ફાસ્ટ બોલર રહેશે, જ્યારે હાર્દિક પંડ્યા બીજા ફાસ્ટ બોલર તરીકે પાવરપ્લેમાં જવાબદારી સંભાળશે. વોશિંગ્ટન સુંદર ફિટ હોવા છતાં, કુલદીપની ગુગલી પાકિસ્તાની બેટ્સમેનો માટે વધુ ઘાતક સાબિત થઈ શકે છે, તેથી કુલદીપ, અક્ષર પટેલ અને વરુણ ચક્રવર્તીની ત્રિપુટી મેદાનમાં જોવા મળી શકે છે.

હવામાનની સ્થિતિને જોતા શરૂઆતની ઓવરોમાં ફાસ્ટ બોલરોને સ્વિંગ મળી શકે છે, પરંતુ જેમ જેમ રમત આગળ વધશે તેમ સ્પિનરોનો દબદબો વધશે. પાકિસ્તાનના કેપ્ટન સલમાન અલી આગાએ પણ સ્વીકાર્યું છે કે તેઓ ભારતની શ્રેષ્ઠ ટીમ સામે લડવા આતુર છે. શિવમ દુબે પણ જરૂર પડ્યે બોલિંગમાં વિકલ્પ બની શકે છે, જે ભારતીય ટીમને વધારાની મજબૂતી આપે છે. આજે જે ટીમ દબાણને વધુ સારી રીતે હેન્ડલ કરશે તે જ જીતની હેટ્રિક સાથે મેદાનની બહાર નીકળશે. કરોડો ક્રિકેટ પ્રેમીઓ માટે આજનો રવિવાર રસાકસીથી ભરપૂર રહેવાનો છે.