પલ્લેકેલે:  ક્રિકેટ જગતમાં આજે એક મોટો ભૂકંપ આવ્યો છે. ૨૦૨૧ની ચેમ્પિયન અને ક્રિકેટની મહાસત્તા ગણાતી ઓસ્ટ્રેલિયન ટીમ T20 વર્લ્ડ કપ ૨૦૨૬ના પહેલા જ રાઉન્ડમાંથી બહાર થઈ ગઈ છે. મંગળવારે પલ્લેકેલેમાં રમાનારી ઝિમ્બાબ્વે અને આયર્લેન્ડ વચ્ચેની મેચ વરસાદને કારણે એક પણ બોલ ફેંકાયા વિના રદ થતા બંને ટીમોને ૧-૧ પોઈન્ટ વહેંચવામાં આવ્યો હતો. આ એક પોઈન્ટ સાથે ઝિમ્બાબ્વે ગ્રુપ B માંથી સુપર-૮માં પહોંચનારી બીજી ટીમ બની ગઈ છે. ઈન્દ્રદેવ જાણે ઓસ્ટ્રેલિયાથી નારાજ હોય તેમ, કેન્ડીના ખરાબ હવામાને કાંગારુઓના રહ્યા-સહ્યા સપનાઓને પણ ધોઈ નાખ્યા છે.

ઓસ્ટ્રેલિયા માટે આ ટુર્નામેન્ટ કોઈ દુઃસ્વપ્નથી ઓછી રહી નથી. ઝિમ્બાબ્વે સામેની આઘાતજનક હાર બાદ શ્રીલંકા સામેની કારમી હાર ઓસ્ટ્રેલિયાને ઘણી મોંઘી પડી. ૨૦૦૯ પછી આ પહેલીવાર છે જ્યારે ઓસ્ટ્રેલિયા સુપર-૮માં પણ પહોંચી શક્યું નથી. ગ્રાઉન્ડ સ્ટાફની તમામ મહેનત છતાં આકાશમાં કાળા વાદળોએ ડેરો જમાવી રાખ્યો હતો અને સાંજે ૫:૩૦ વાગ્યે સત્તાવાર રીતે મેચ રદ જાહેર થતા જ ઓસ્ટ્રેલિયન કેમ્પમાં સન્નાટો છવાઈ ગયો હતો. સતત ત્રીજા T20 વર્લ્ડ કપમાં સેમિફાઈનલ સુધી ન પહોંચી શકવું એ ઓસ્ટ્રેલિયન ક્રિકેટના પતનનો સંકેત આપી રહ્યું છે.

બીજી તરફ, આ આખા અપસેટનો અસલી હીરો ઝિમ્બાબ્વે સાબિત થયું છે. પોતાના ક્રિકેટ ઇતિહાસમાં પહેલીવાર ઝિમ્બાબ્વે વર્લ્ડ કપના બીજા રાઉન્ડમાં પ્રવેશ્યું છે. ૧૯૯૯ના વનડે વર્લ્ડ કપમાં પાંચમા સ્થાને રહ્યા બાદ આ તેમની સૌથી મોટી સિદ્ધિ છે. ઝિમ્બાબ્વેના ખેલાડીઓ અને ચાહકો માટે આ દિવાળી જેવો માહોલ છે, કારણ કે તેમણે ઓસ્ટ્રેલિયા જેવી દિગ્ગજ ટીમને હરાવીને બહાર કરી છે. હવે સુપર-૮માં ઝિમ્બાબ્વે અને શ્રીલંકાની ટીમો અન્ય દિગ્ગજો સામે ટકરાશે, જ્યારે પાંચ વખતની વનડે ચેમ્પિયન ઓસ્ટ્રેલિયાને ખાલી હાથે ઘરે પરત ફરવું પડશે.