શ્રીનગર : ભારતીય ઘરેલું ક્રિકેટના ઈતિહાસમાં આજે એક નવું પ્રકરણ લખાયું છે. રણજી ટ્રોફીની રોમાંચક સેમિફાઈનલમાં જમ્મુ અને કાશ્મીરે શક્તિશાળી બંગાળની ટીમને ૬ વિકેટથી ધૂળ ચટાડીને પહેલીવાર ફાઈનલમાં પ્રવેશ કરી ઈતિહાસ રચી દીધો છે. કાશ્મીરી ખીણમાં અત્યારે આ જીતનો જશ્ન મનાવવામાં આવી રહ્યો છે, કારણ કે આ ટીમે સાબિત કરી દીધું છે કે હવે તેઓ ભારતીય ક્રિકેટનું નવું પાવરહાઉસ છે.
કાશ્મીરી કેસરે બંગાળી ટાઈગર્સનો શિકાર કર્યો
મેચના ચોથા દિવસે જમ્મુ-કાશ્મીરને જીતવા માટે માત્ર ૮૩ રનની જરૂર હતી. જોકે, શરૂઆતમાં કેપ્ટન પારસ ડોગરા અને શુભમ પુંડિરની વિકેટ પડતા થોડો ફફડાટ ફેલાયો હતો, પણ અબ્દુલ સમદ (૩૦*) અને વંશજ શર્મા (૪૩*) એ બાજી સંભાળી લીધી હતી. સમદે માત્ર ૨૭ બોલમાં ૩ છગ્ગા ફટકારીને બંગાળના બોલરોને પાયમાલ કરી દીધા હતા. આ જીતનો અસલી પાયો ઔકિબ નબી (૯ વિકેટ) અને સુનીલ કુમાર (૭ વિકેટ) એ નાખ્યો હતો, જેમણે બંગાળની બીજી ઇનિંગને માત્ર ૯૯ રનમાં સમેટી લીધી હતી.
કર્ણાટકનો રનનો પહાડ: ઉત્તરાખંડ દબાયું
બીજી સેમિફાઈનલમાં કર્ણાટકે ઉત્તરાખંડની હાલત ખરાબ કરી દીધી છે. પ્રથમ દાવમાં ૭૩૬ રનનો વિશાળ સ્કોર બનાવ્યા બાદ, કર્ણાટકે બીજી ઇનિંગમાં પણ સ્મરણ રવિચંદ્રનની શાનદાર સદી (૧૨૭) અને કે.એલ. રાહુલની આક્રમક અર્ધસદી (૭૦*) ની મદદથી ૨૯૯/૬ રન બનાવી લીધા છે. કર્ણાટક પાસે હવે કુલ ૮૦૨ રનની અજેય લીડ છે, જે રણજી ટ્રોફીના ઈતિહાસની સૌથી મોટી લીડ પૈકીની એક છે.
કે.એલ. રાહુલ ફોર્મમાં, પડિકલ ઈજાગ્રસ્ત
કર્ણાટક માટે ચિંતાના સમાચાર એ છે કે તેમના કેપ્ટન દેવદત્ત પડિકલને હાથમાં ઈજા થતા તેઓ મેદાનની બહાર ગયા હતા. જોકે, ટીમ ઈન્ડિયાના સ્ટાર બેટ્સમેન કે.એલ. રાહુલે જવાબદારી સંભાળીને અણનમ ૭૦ રન ફટકારી ફાઈનલ પહેલા પોતાના ફોર્મનો સંકેત આપી દીધો છે. ઉત્તરાખંડની ટીમ પ્રથમ દાવમાં માત્ર ૨૩૩ રનમાં ઓલઆઉટ થઈ ગઈ હતી, જેમાં વૈશાક અને વિદ્યાધર પાટિલે ૩-૩ વિકેટ ઝડપી હતી.
હવે રણજી ટ્રોફીની ફાઈનલમાં જમ્મુ-કાશ્મીરનો મુકાબલો કોની સામે થશે તેના પર સૌની નજર છે. કાશ્મીરી જવાનોનો આ આત્મવિશ્વાસ ફાઈનલમાં પણ વિરોધી ટીમ માટે ખતરો બની શકે છે.